Rama: Shqipëria me rekord mbi 1 milion vizitorë në trashëgiminë kulturore

Kryeministri Edi Rama ka bërë të ditur sot se mbi 1 milion vizitorë kanë frekuentuar gjatë këtij viti kalatë, muzetë dhe parqet arkeologjike të Shqipërisë, shifër që përfaqëson një rritje prej 58% krahasuar me vitin 2023. Sipas tij, kjo ka sjellë edhe një rritje prej 84% të të ardhurave, falë mirëadministrimit dhe menaxhimit më efikas të këtyre pasurive kulturore.

“Shqipëria është një ballkon i hapur mbi Mesdhe, një muze nën qiell, ku çdo gur rrëfen histori dhe çdo rrugë është kapitull i trashëgimisë sonë të gjallë”, u shpreh Rama në një reagim në rrjetet sociale.

Kryeministri bëri të ditur gjithashtu se kalatë dhe parqet arkeologjike do të përfshihen në një skemë të re menaxhimi, e cila do të synojë jo vetëm restaurimin dhe konservimin, por edhe krijimin e infrastrukturës moderne për vizitorët, zhvillimin e itinerareve të reja kulturore dhe një promovim më të gjerë ndërkombëtar të trashëgimisë shqiptare.