Rama vlerëson Nikos Dendias: Mik i çmuar dhe partner i besueshëm i marrëdhënieve Shqipëri-Greqi

Kryeministri Edi Rama priti këtë të hënë në një takim ministrin grek të Mbrojtjes, Nikos Dendias, të cilin e cilëson si “një mik të çmuar dhe një mbështetës të palëkundur të partneritetit strategjik mes Shqipërisë dhe Greqisë”. Përmes një mesazhi publik, Rama vlerësoi marrëdhëniet mes dy vendeve, duke theksuar rëndësinë e forcimit të bashkëpunimit strategjik dhe dialogut mes Tiranës dhe Athinës.

Dendias ishte takuar me homologun shqiptar, Ermal Nufi. Vizita e zyrtarit grek konsiderohet si një hap i ri në përpjekjet mes dy vendeve për të rikthyer negociatat mbi çështjen e kufirit detar, një proces që prej vitesh ka mbetur pezull.

Në fokus të bisedimeve pritet të jetë përgatitja e një marrëveshjeje formale, e cila do t’i hapte rrugë dërgimit të mosmarrëveshjes për shelfin kontinental dhe Zonën Ekonomike Ekskluzive në Gjykatën Ndërkombëtare të Drejtësisë në Hagë.

Marrëveshja e parë mes palëve, e firmosur gjatë qeverisë Berisha, u rrëzua nga Gjykata Kushtetuese. Edhe tentativa e mëvonshme për ta çuar çështjen në Hagë mbeti në vendnumëro, pasi ekipet negociatore nuk u ngritën asnjëherë.

Athina dhe Tirana duket se po kërkojnë të shfrytëzojnë klimën pozitive të marrëdhënieve dypalëshe për të gjetur një zgjidhje përfundimtare për këtë çështje të kahershme. Nga ana tjetër, Greqia ka rikonfirmuar mbështetjen për integrimin europian të Shqipërisë. Gjatë vizitës së tij të fundit në Greqi, Rama tha se kundërshtimi i marrëveshjes në Gjykatën Kushtetuese, në kohën kur ai ishte në opozitë, lidhej kryesisht me rrethanat politike të asaj periudhe.