Reforma Territoriale, Berisha akuza për projektin nga PS: Duan të heqin 15 bashki, PD shton 40

Kryetari i Partisë Demokratike, Sali Berisha, kundërshtoi nga Elbasani ndarjen e re territoriale të propozuar nga mazhoranca, ndërsa deklaroi se PD do të shtojë të paktën 40 bashki të tjera. Në fjalën e mbajtur në kuadër të “Foltores së Ripërtëritjes”, Berisha u shpreh se me reformën e re territoriale po thellohen më tej gabimet e reformës së mëparshme.

“Këta nuk kanë asnjë interes për qytetarët. Në vend se të korrigjohen gabimet shumë të mëdha që u bënë, po thellohen më tej duke hequr edhe 15 bashki të tjera”, tha ai. Berisha bëri të ditur se në qarkun e Elbasanit do të shkrihen tri bashki, të cilat, sipas tij, janë funksionale, të suksesshme dhe në interes të qytetarëve.

“Por ata nuk kanë interes tjetër, përveç pushtetit të tyre. Ne kemi një projekt. Projekti ynë është publik. Ne jo që nuk heqim bashki, por ne shtojmë të paktën edhe 40 bashki, dhe këtu në qarkun e Elbasanit dhe në çdo qark të Shqipërisë, në mënyrë që qytetarët të jenë sa më afër pushtetit”, theksoi ai. Po ashtu, Berisha theksoi se PD është e vendosur të dyfishojë rrogat dhe pensionet si kushti i parë i mandatit të parë, si dhe të heqë taksën për të gjitha ushqimet.

Nga Elbasani, Berisha deklaroi gjithashtu zero tolerancë ndaj krimit të organizuar. “U deklaroj këtu nga kjo sallë, organizatave kriminale të Elbasanit, të Durrësit, të Shkodrës dhe të mbarë Shqipërisë, se vend mbi tokë nuk do të keni përveç burgut. Keni dëmtuar rëndë qytetarët, Shqipërinë”, tha ai.