Reshjet nuk reshtin, por borëpastruesit garantojnë kalueshmëri të mjeteve me zinxhirë në aksin rrugor Qafë Thore- Theth

Reshjet e borës nuk po ndalen, por puna në terren është intensive dhe e koordinuar. Në një situatë që paralajmëron hyrjen e vërtetë të dimrit malor, kryebashkiaku i Shkodrës, Benet Beci, njofton se aksi rrugor Qafë Thore–Theth vijon të jetë i hapur dhe i kalueshëm, pavarësisht reshjeve të dendura që kanë rënë pa ndërprerë gjatë ditës së djeshme dhe natës së sotme.

Në postimin e tij në rrjetet sociale, Beci thekson se mjetet e qarkullimit mund të lëvizin vetëm nëse janë të pajisura me zinxhirë, ndërsa garanton se kontraktori i mirëmbajtjes së rrugës është në gatishmëri të plotë, duke ndjekur situatën nga afër dhe duke ndërhyrë në çdo moment që kërkohet.
Videoja e publikuar shfaq pamje të borëpastruesve që punojnë pa ndërprerje në terren, me ritëm të lartë dhe mjete të dedikuara, për të siguruar që lidhja vitale Qafë Thore–Theth të mos ndërpritet. Vargu i pajisjeve që hapin shtresat e borës dhe spastrojnë rrëshqitjet dëshmon për seriozitetin e sfidës dhe për përkushtimin për të mbajtur zonën të aksesueshme, sidomos në një periudhë ku komuniteti vendas dhe vizitorët varen nga çdo metër i këtij aksi.
Sipas autoriteteve vendore, kjo është vetëm faza e parë e një dimri që pritet të jetë i vështirë për zonat alpine. Puna për mbajtjen e të gjitha akseve të kalueshme, veçanërisht atyre që lidhin fshatrat malorë me qendrat urbane, sapo ka nisur dhe kërkon vigjilencë të vazhdueshme, koordinim institucional dhe përkushtim ditor.
Shenjat e para të reshjeve të dendura tregojnë qartë se dimri i këtij viti do të kërkojë më shumë energji, më shumë punë dhe ndërhyrje të menjëhershme për të shmangur izolimin e zonave të thella. Angazhimi i strukturave të pushtetit vendor dhe kompanive të mirëmbajtjes synon pikërisht këtë: të mos lejohet që bora të kthehet në pengesë për lëvizjen e banorëve, furnizimet e nevojshme dhe normalitetin e jetës së përditshme në një nga zonat më të bukura, por edhe më të ekspozuara ndaj kapriçove të dimrit.

AV/KJ