Richard Grenell ka zgjedhur sërish Shqipërinë për të kaluar ditët e fundit të verës. Ish-diplomati amerikan është shfaqur në zonën e Vlorës dhe Radhimës, këtë herë në një moment të relaksuar, ndërsa duket se po shijon pushimet së bashku me familjen dhe miqtë.
Në një postim të publikuar në rrjetet sociale, Grenell ka ndarë edhe arsyen pse bregdeti shqiptar mbetet një prej destinacioneve të tij të preferuara. Ai i referohet ujërave të Adriatikut dhe Jonit, duke e përshkruar efektin e detit, kripës dhe diellit si rigjallërues. “Ujërat e Adriatikut dhe Jonit janë të mbushura me disa prej ujërave më të kripura në botë. Për mua janë shëruese”, shkruan Grenell.
Postimit të tij nuk i mungon as një referencë biblike. Duke iu referuar vargut Mateu 5:13, ku thuhet “Ju jeni kripa e tokës”, Grenell e lidh përvojën e tij në bregdet me ndjesinë e rigjallërimit fizik. “Mund ta ndiej trupin tim duke përthithur kripën dhe diellin dhe duke u rigjallëruar”, shprehet ai.
Grenell duket se ka planifikuar një qëndrim disajavor në Shqipëri, duke e konsideruar bregdetin shqiptar një mënyrë ideale për të përmbyllur sezonin e verës. “Disa javë në bregdetin e Shqipërisë janë vendi perfekt për ta mbyllur verën me familjen dhe miqtë. E dua këtë vend”, shkruan ai në përmbyllje të postimit.