Riparohet tubacioni, rikthehet uji në Vlorë pas pesë ditësh

Rikthehet uji në Vlorë! Pajisja që nevojitej për të riparuar defektin në rrjetin ujësjellës në Vlorë është montuar përgjatë natës, ndërsa furnizimi me ujë vijon të jetë i pjesshëm.

Gjithashtu, furnizimi i depos ka filluar mëngjesin e kësaj të marte dhe shpërndarja te të gjithë konsumatorët do të vijojë pasdite.

Drejtori i Ujësjellësit Vlorë, Ermal Murati, deklaroi se defekti i rëndë është drejt zgjidhjes dhe se qyteti pritet të kthehet plotësisht në normalitet gjatë orëve të pasdites.

Sipas tij, pajisja e dëmtuar është tashmë funksionale dhe situata po monitorohet vazhdimisht. Aktualisht, një pjesë e qytetit po furnizohet me ujë, ndërsa depot po mbushen për të garantuar furnizim të plotë në vijim.

Qytetarët e Vlorës u përballen me mungesën e ujit të pijshëm për 5 ditë me radhë, rast që u pasua me 2 protesta të njëpasnjëshme, që vunë në lëvizje autoritetet shtetërore.