Ronald Koeman jep dorëheqjen nga drejtimi i Holandës pas eliminimit befasues nga Maroku

Trajneri i kombëtares së Holandës, Ronald Koeman, ka njoftuar dorëheqjen e tij pas eliminimit të ekipit nga Maroku në fazën e 1/16-ve të Kupës së Botës.

“Tulipanët” konsideroheshin ndër skuadrat favorite për të bërë një rrugëtim të gjatë në turne, por u ndalën nga Maroku, i cili triumfoi 3-2 pas ekzekutimit të penalltive. Ndeshja e zhvilluar në Monterrey ishte mbyllur 1-1 pas kohës së rregullt dhe shtesave.

Holanda ishte shumë pranë kualifikimit, pasi kryesonte 1-0 falë golit të Cody Gakpo në minutat e fundit të takimit. Megjithatë, marokenët barazuan në kohën shtesë me anë të Issa Diop, duke e çuar sfidën te penalltitë. Nga pika e bardhë, Justin Kluivert, Quinten Timber dhe Crysencio Summerville gabuan për Holandën, duke vulosur eliminimin e skuadrës së Koeman.

Në një deklaratë të publikuar në Instagram, 63-vjeçari konfirmoi largimin e tij nga drejtimi i përfaqësueses holandeze.

“Mbrëmë mora vendimin për t’i dhënë fund detyrës sime si trajner i kombëtares së Holandës. Të gjithë ndanim ëndrrën për të bërë histori në këtë Kupë Bote, por nuk ia dolëm. Askush nuk është më i zhgënjyer se unë. Si trajner, përgjegjësia përfundimtare bie mbi mua”, u shpreh Koeman.

Ai zbuloi gjithashtu se vendimi i tij është ndikuar edhe nga situata e vështirë familjare, pasi bashkëshortja e tij, Bartina Koeman, po lufton me kancerin e gjirit.

“Vitet e fundit më kanë bërë të kuptoj se ka gjëra më të rëndësishme se futbolli. Futbolli ka qenë jeta ime, por shëndeti nuk ka çmim. Kur një person që e do përballet me një betejë të vështirë, këndvështrimi yt ndryshon”, deklaroi ai.

Koeman, ish-futbollist dhe trajner i njohur i FC Barcelona, ka drejtuar gjithashtu klubet angleze Southampton dhe Everton. Ky ishte mandati i tij i dytë në krye të kombëtares holandeze.

Ndërkohë, Federata Holandeze e Futbollit ka dënuar ashpër komentet raciste dhe diskriminuese të publikuara në rrjetet sociale ndaj lojtarëve të kombëtares pas eliminimit nga turneu.

“Futbolli bashkon njerëzit, pavarësisht origjinës apo prejardhjes së tyre. Kemi parë reagime në internet ku lojtarët janë bërë objekt i fyerjeve raciste dhe diskriminuese pas eliminimit të ekipit. Ne vendosim një vijë të kuqe ndaj këtij lloj sjelljeje. Racizmi dhe diskriminimi nuk kanë vend në futboll, online apo në shoqërinë tonë”, thuhet në reagimin zyrtar të federatës.