Rrajca kundër shkrirjes së Prrenjasit, banorët kërkojnë qëndrim nga deputetja Muzhaqi

Dëgjesat publike për propozimet e reformës së re territoriale, të konceptuara si takime informuese dhe konsultuese, po shndërrohen gjithnjë e më shumë në përballje mes banorëve dhe përfaqësuesve të tyre në Kuvendin e Shqipërisë.

Një situatë e tillë u shënua edhe në Rrajcë, ku banorët e mbledhur në dëgjesën publike, në prani të deputetes socialiste së zonës, Bora Muzhaqi, kërkuan të dinë qëndrimin e saj lidhur me propozimin për shkrirjen e Bashkisë Prrenjas dhe bashkimin e saj me Bashkinë Librazhd. Banorët kërkuan një përgjigje të qartë nëse deputetja që i përfaqëson do të votojë kundër kësaj pjese të reformës territoriale.

Gjatë takimit, disa prej tyre shprehën skepticizëm edhe për premtimet për përmirësimin e shërbimeve publike, duke i cilësuar ato si premtime që nuk janë mbajtur në praktikë. Debati u shoqërua me pakënaqësi nga ana e banorëve, të cilët kërkuan garanci konkrete për të ardhmen e zonës dhe për shërbimet që do t’u ofrohen pas riorganizimit territorial.

Në përfundim të takimit, një pjesë e banorëve u larguan të pakënaqur, pasi nuk morën përgjigjen që kërkonin nga deputetja. Ata deklaruan se, nëse reforma e re territoriale miratohet në formën e propozuar, nuk do të kenë më mbështetjen e tyre për përfaqësuesit politikë që do ta votojnë atë.