Mazhoranca dhe deputetët e Parlamentit Europian në Komitetin Parlamentar të Stabilizim Asociimit kanë rrëzuar dy amendamente që kanë të bëjnë me zonën e mbrojtur Vjosa-Narta dhe imunitetin parlamentar.
Sipas socialistëve të dyja këto çështje pasqyrohen në Rezolutën e Parlamentit Europian dhe i janë bashkëngjitur këtij këshilli, pa qenë nevoja për t’u bërë pjesë e rezolutës që u shtrua për diskutim në Komitet. Në amendamentin për zonat e mbrojtura përmendet sërish vendosja e një moratoriumi për lejet e ndërtimit, term i miratuar edhe në rezolutën e Parlamentit Europian.
“Shpreh shqetësim serioz se zhvillimet në vazhdim brenda zonës së mbrojtur Vjosa–Narta tregojnë pasojat praktike të ndryshimeve ligjore që prekin zonat e mbrojtura. Ndjek nga afër protestat masive paqësore që po zhvillohen në këtë drejtim dhe u bën thirrje autoriteteve shqiptare të vendosin menjëherë një moratorium për të gjitha procedurat e reja të dhënies së lejeve”, thuhet në amendamentin e rrëzuar.
Duke folur në këtë mbledhje, bashkëkryetari i Komitetit Parlamentar të Stabilizim-Asociimit Bashkimi Europian–Shqipëri, Taulant Balla, tha se: “Në legjislacionin tonë nuk ka një zonë që quhet Vjosa- Narta. Është një park I Vjosës dhe një I Nartës, nuk është park I përbashkët. E di për luftën e mirë që keni bërë për parkun e Vjosës, është zonë e mbrojtur 100%. Keni bërë një ankesë lidhur me aeroportin e Vlorës. Aty ka pasur një aeroport shumë kohë më parë dhe është ndërtuar nga italianët fatkeqësisht. Ne na nevojitet një aeroport në Jug dhe kjo s’ka të bëjë me çështjet mjedisore, por ka të bëjë me konkurrencën. E dimë pse disa thonë që Shqipëria nuk duhet të ketë aeroport në Jug. Shpresoj që vitin që vjen të fluturojmë nga Vlora në Strasburg. Do propozoj që takimi të bëhet në Vlorë dhe të realizoni një mision fakt-mbledhës bashkë, jo për të bërë politikë dhe për të ndarë lajme në mediat sociale”.
“Objektivi ynë është që të promovojmë turizëm të qëndrueshëm, sepse kemi nevojë për më shumë vende pune. Jemi gjithashtu të bindur që të thithim investime dhe do të mbrojmë të gjitha aspektet mjedisore. Është e rëndësishme që të shikohet gjithë kuadri, mbrojtja mjedisore dhe rritja ekonomike shkojnë paralel me njëra-tjetrën, dhe kjo është mënyra për të shkuar drejt një Shqipërie më të zhvilluar dhe më të gjelbër. Dezinformimi është një luftë që duhet ta luftojme bashkërisht”, vijoi ai.
Amendamentet e rrëzuara
8a (i ri). Rikujton se imuniteti parlamentar është pjesë e kuadrit kushtetues të Shqipërisë dhe duhet të zbatohet në mënyrë rigoroze, në përputhje me dispozitat kushtetuese dhe procedurat ligjore të përcaktuara, pa ndërhyrje politike dhe pa vonesa të pajustifikuara. Shpreh shqetësim për vendimet e Kuvendit dhe komentet publike të zyrtarëve shtetërorë në lidhje me hetimet ndaj ish-zyrtarëve publikë dhe deputetëve, përfshirë rastet kur veprime të tilla rrezikojnë të ndërhyjnë ose të cenojnë pavarësinë e SPAK-ut dhe institucioneve të tjera të drejtësisë. Gjithashtu thekson se vendimet për heqjen e imunitetit duhet të udhëhiqen nga standardet evropiane, veçanërisht nga opinionet dhe rekomandimet e Komisionit të Venecias.
12a (i ri). Shpreh shqetësim serioz se zhvillimet në vazhdim brenda zonës së mbrojtur Vjosa–Narta tregojnë pasojat praktike të ndryshimeve ligjore që prekin zonat e mbrojtura. Ndjek nga afër protestat masive paqësore që po zhvillohen në këtë drejtim dhe u bën thirrje autoriteteve shqiptare të vendosin menjëherë një moratorium për të gjitha procedurat e reja të dhënies së lejeve, punimet e ndërtimit dhe ndërhyrjet zhvillimore brenda zonave të mbrojtura, derisa të shfuqizohen dispozitat e papajtueshme të ligjit të ndryshuar “Për Zonat e Mbrojtura” dhe të garantohet përputhshmëria e plotë me standardet e Bashkimit Evropian për mbrojtjen e natyrës.