Sezoni turistik po sjell rezultate pozitive për qarkun e Lezhës, ku numri i vizitorëve është rritur me 15% në krahasim me të njëjtën periudhë të vitit të kaluar. Të dhënat janë bërë publike nga kryebashkiaku Pjerin Ndreu dhe janë shpërndarë edhe nga kryeministri Edi Rama.
Në një reagim në rrjetet sociale, Rama theksoi se rritja e turizmit nuk përfaqëson vetëm statistika, por dëshmon zhvillimin e pandalshëm të Lezhës dhe të gjithë Shqipërisë. Sipas tij, investimi në resorte me pesë yje është tashmë një domosdoshmëri, jo vetëm për zhvillimin ekonomik, por edhe për rëndësinë gjeostrategjike të vendit.
Sipas shifrave të publikuara, krahas turistëve vendas dhe vizitorëve nga Kosova, këtë sezon vihet re një rritje e ndjeshme e turistëve të huaj, të cilët përbëjnë rreth 20% të totalit të pushuesve që kanë zgjedhur bregdetin e Shëngjinit.
Vizitorët vijnë kryesisht nga Gjermania, Polonia, Italia, Çekia, Austria, Zvicra, Rumania, Ukraina, Bullgaria, Maqedonia e Veriut dhe Suedia. Të dhënat e mbledhura nga bizneset turistike tregojnë se turistët gjermanë përbëjnë grupin më të madh të të huajve, me rreth 20% të totalit, të ndjekur nga polakët me 15%, ndërsa italianët dhe çekët zënë nga 10% secili.
Shifrat konfirmojnë se Lezha dhe veçanërisht Shëngjini po forcojnë pozitat si një nga destinacionet turistike më të preferuara në Shqipëri, duke tërhequr çdo vit një numër në rritje vizitorësh nga vendet europiane.