Nga Albert Vataj
Marco Rubio, sekretari amerikan i Shtetit dhe një figurë e njohur e politikës konservatore amerikane, zhvilloi një vizitë simbolike në varrin e shenjtores shqiptare Nënë Tereza, gjatë qëndrimit të tij në Indi. Fotografia e publikuar e paraqet atë dhe bashkëshorten e tij, duke u lutur pranë memorialit të Nënë Terezës, në prani të murgeshave të Misionareve të Bamirësisë, urdhrit fetar të themeluar prej saj në Kalkutë.
U.S. Secretary of State Marco Rubio visited the tomb of St. Mother Teresa during a trip to India this weekend, praying at the headquarters of the Missionaries of Charity in Kolkata.
The visit comes amid growing concerns from Christian leaders and U.S. lawmakers over proposed…
— Crux Now Media (@Crux) May 23, 2026
Vizita ka një peshë të shumëfishtë, fetare, diplomatike dhe simbolike. Rubio është katolik praktikant dhe gjatë karrierës së tij politike ka folur shpesh për rëndësinë e besimit në jetën publike dhe personale. Prania e tij në vendprehjen e Nënë Terezës nuk shihet vetëm si një gjest protokollar, por edhe si një akt devocioni ndaj një figure që mbetet ndër ikonat më universale të mëshirës dhe shërbimit ndaj të varfërve.
Varri i Nënë Terezës ndodhet në selinë e Missionaries of Charity në Kolkata, qyteti ku ajo kaloi pjesën më të madhe të jetës së saj në shërbim të të varfërve, të sëmurëve dhe të braktisurve. Për miliona besimtarë dhe vizitorë nga e gjithë bota, ai vend është shndërruar në një hapësirë pelegrinazhi moral dhe shpirtëror.
Shenjtorja shqiptare Nënë Tereza, mbetet një nga figurat më të njohura të shekullit XX. Ajo u nderua me Çmimin Nobel për Paqe, për veprën e saj humanitare dhe u shpall shenjtore nga Papa Françesku në vitin 2016.
Me këtë veprim sekretari Amerikan i Shtetit tregon se mbetet një katolik me vlera universale.
Vizita e Rubios vjen në një moment kur India po forcon gjithnjë e më shumë marrëdhëniet strategjike me Shtetet e Bashkuara, por fotografia mbart edhe një dimension tjetër, përballë zhurmës së politikës globale, fuqisë dhe interesave gjeopolitike, qëndron heshtja e një varri ku prehet një grua që ndërtoi autoritetin e saj jo mbi pushtetin, por mbi dhembshurinë.