Kreu i Partisë Mundësia Agron Shehaj thotë se debati për pagat e gjyqtarëve është i stisur nga kryeministri Edi Rama. Për të paprekshmërinë e pagës së magjistratëve e parashikon Kushtetuta e Shqipërisë, me qëllim garantimin e pavarësisë së pushtetit gjyqësor. ”Sepse do që të pengojë Kryeministrin që të marrë peng drejtësinë”, thekson Shehaj.
Nga ana tjetër, Shehaj shprehet se këtë debat jo real mbi pagat e gjyqtarëve Rama e nxjerr në opinionin publik për shkak se sipas tij kryeministri është i terrorizuar nga hetimet e gjyqësorit për qeveritarët. ”Rama është i dëshpëruar, nuk di më se cfarë bën. Pasi ka sulmuar gjykatësit, pasi u ka thënë atyre që janë prokurorë si në kohën e komunizmit, pasi u ka thënë atyre që Erion Veliaj është arrestuar pa vendim gjykate, pasi u ka thënë që gjyqësori do të vendosë se kush do të qeverisë, tani është aq i terrorizuar sa merret me pagat. Një debat i stisur”.
Gjykata Kushtetuese sipas kreut të Mundësia ka folur dhe ‘nuk ka asnjë shans që në këtë përplasje Edi Rama t’ja dalë’. Shehaj i bën thirrje kryeministrit që t’u japë përgjigje qytetarëve shqiptarë se si i ka vjedhur, se si u ka dhënë atyre qeveri të korruptuara nga 2013 deri më sot. ”Rama të mbajë përgjegjësi për Veliajn, Ballukun dhe të japë dorëheqje sic kërkojnë protestuesit prej më shumë se 3 muajsh”.
