Në komunikimin e tij me ndjekësit në rrjetet sociale, kryebashkiaku i Shkodrës, Benet Beci, ka ndarë një tjetër shembull konkret të investimeve në infrastrukturën arsimore të qytetit, duke vënë në qendër transformimin e shkollës 9-vjeçare “Kolë Idromeno”, një prej institucioneve që ka njohur një ndryshim rrënjësor në kushtet e zhvillimit të procesit mësimor.
“Duke ofruar kushte moderne dhe bashkëkohore për rreth 400 nxënës dhe stafin pedagogjik, shkolla “Kolë Idromeno” përfaqëson sot një standard të ri të arsimit publik në Shkodër. Klasa tërësisht të rikonstruktuara, ambiente funksionale, hapësira të ndriçuara dhe dinjitoze krijojnë një mjedis të përshtatshëm për mësimdhënie dhe për formimin e brezave të rinj. Ne do të vazhdojmë të investojmë çdo ditë për një Shkodër ku fëmijët tanë mësojnë në shkolla moderne dhe me kushtet që meritojnë”, shkruan kryebashkiaku.
Publikimi shoqërohet me një fotogaleri që dokumenton transformimin e plotë të këtij institucioni arsimor, duke sjellë në vëmendje ndryshimin e dukshëm të ambienteve të brendshme dhe të jashtme. Pamjet dëshmojnë investimet e realizuara për krijimin e një infrastrukture bashkëkohore, të përshtatur me nevojat e arsimit modern dhe me standardet që kërkon një proces cilësor mësimor.
Ky investim përfaqëson jo vetëm një ndërhyrje në godinën e shkollës, por edhe një vizion për të ardhmen, ku arsimi trajtohet si një prioritet i zhvillimit të qytetit. Përmirësimi i kushteve të mësimit, krijimi i hapësirave të sigurta dhe funksionale, si dhe garantimi i një mjedisi dinjitoz për nxënësit dhe mësuesit, janë elementë që dëshmojnë angazhimin e pushtetit vendor për ta vendosur dijen në themel të zhvillimit të Shkodrës dhe të brezave që do të ndërtojnë të ardhmen e saj.
AV/KJ