Shqiptarët besojnë tek SPAK-u dhe partneriteti me Amerikën

Një vrojtim statistikor i realizuar nga studiuesit Eduard Zaloshnja, Arjan Dyrmishi dhe Alaattin Ozde, me mbështetjen e Ambasadës Gjermane, tregon se shumica e shqiptarëve vazhdojnë ta mbështesin reformën në drejtësi dhe kërkojnë që lufta kundër korrupsionit të mbetet prioritet kryesor edhe në pesë vitet e ardhshme.

Rreth dy të tretat e të rriturve kanë shprehur opinion pozitiv për reformën në drejtësi, ndërsa mbi 90% e tyre e konsiderojnë atë të domosdoshme. Megjithatë, vetëm një në katër qytetarë beson se reforma ka sjellë ndikim të drejtpërdrejtë në jetën e përditshme. Zaloshnja theksoi se gjysma e të anketuarve janë të kënaqur me procesin e Vettingut, por shumë prej tyre mendojnë se në sistem vazhdojnë të ketë gjyqtarë dhe prokurorë të korruptuar.

Sa i përket institucioneve të drejtësisë, SPAK rezulton organi më i besuar nga qytetarët, me 70% mbështetje, i ndjekur nga Gjykata Kushtetuese me 58%. Nga ana tjetër, një pjesë e madhe e të anketuarve vlerësojnë se SPAK nuk ka realizuar mjaftueshëm sekuestrime ndaj pasurive të personave të përfshirë në korrupsion apo aktivitet kriminal.

Anketa e zhvilluar në të gjithë vendin me mbi 1100 të rritur, evidenton shqetësime serioze lidhur me korrupsionin në sistemin e drejtësisë. 50% e pjesëmarrësve deklaruan se njohin dikë në familje ose rrethin shoqëror që ka dhënë ryshfet, ndërsa mbi 62% pranuan se do të konsideronin pagesë nën dorë për gjyqtarë apo prokurorë nëse kjo do t’i ndihmonte për të zgjidhur një problem.