S’ka më gomone! The Sun: Shqiptarët tani po futen ilegalisht me jahte në Angli

Një investigim i publikuar nga tabloidi britanik The Sun pretendon se një rrjet kriminal shqiptaro-britanik po përdor jahte luksoze për të kontrabanduar emigrantë dhe persona me precedentë penalë drejt Mbretërisë së Bashkuar, duke shmangur kontrollet më të rrepta në portet kryesore.

Sipas The Sun, gazetarët u paraqitën si një shtetas shqiptar i deportuar më parë nga Britania, pasi kishte vuajtur dënimin në burgun Wandsworth në Londër.

Pas kontakteve fillestare në TikTok, komunikimi u zhvendos në WhatsApp, ku personat e dyshuar thuhet se ofruan një vend në një jaht luksoz që do të nisej nga Holanda drejt zonës pranë Doverit, kundrejt pagesës prej 15.500 paundësh.

Në bisedat e publikuara nga The Sun, një prej personave të përfshirë pretendon se kishte vuajtur dënim në Britani për trafik droge dhe ishte deportuar. Ai u shpreh se udhëtimi do të kryhej me një jaht me tre kabina luksoze, me jo më shumë se dhjetë pasagjerë dhe me ekuipazh shqiptar.

Sipas investigimit, pagesa duhej të kryhej në Shqipëri përpara nisjes, ndërsa pas mbërritjes pranë Doverit, emigrantët do të transportoheshin me automjete drejt Londrës.

The Sun pretendon gjithashtu se grupi kishte organizuar më parë udhëtime të ngjashme dhe se një jaht ishte marrë me qira për rreth 50 mijë euro për këtë aktivitet.

Media britanike lidh këtë rast me një fenomen më të gjerë të rikthimit në Britani të personave të deportuar. Duke cituar të dhëna zyrtare, ajo shkruan se gjatë pesë viteve të fundit 4.614 persona janë rikthyer në Mbretërinë e Bashkuar pasi ishin dëbuar më parë, ndërsa mbi një e treta e tyre ishin shtetas shqiptarë.

Investigimi përmend gjithashtu raste të mëparshme të goditura nga autoritetet britanike. Në muajin maj, pesë persona u arrestuan pasi një jaht me shtatë emigrantë u ndalua në brigjet jugore të Anglisë. Ndërsa në mars, dy shtetas ukrainas u dënuan me burg pasi organizuan transportimin e pesë shqiptarëve dhe një vajze vietnameze me jaht, kundrejt pagesës prej 13 mijë paundësh për person.

Pas publikimit të gjetjeve, The Sun njoftoi se ia ka referuar rastin platformës TikTok, e cila mbylli llogarinë e raportuar brenda një ore, duke e cilësuar atë si shkelje të rregullave kundër trafikimit të qenieve njerëzore. Dosja, sipas gazetës, do t’i dorëzohet edhe Agjencisë Kombëtare Britanike të Krimit (NCA).

Në fund të artikullit, tabloidi trajton edhe aktivitetin e grupeve kriminale shqiptare në Britani, duke përmendur organizata të njohura të trafikut të drogës dhe duke pretenduar se rrugët e kontrabandimit drejt Mbretërisë së Bashkuar po evoluojnë, me përdorimin në rritje të mjeteve luksoze lundruese për të shmangur kontrollet kufitare.

Autoritetet britanike nuk kanë publikuar deri tani një reagim zyrtar lidhur me pretendimet specifike të ngritura në këtë investigim.