Sulmet me review negative ndaj bizneseve, Erion Braçe: Krim me pasoja për ekonominë dhe sigurinë

Deputeti i PS-së, Erion Braçe, thotë se review-t negative ndaj bizneseve janë një sulm i organizuar, ndaj dhe kërkon marrjen e masave. Nga foltorja e Kuvendit, Braçe nënvizoi se po tentohet të goditet ekonomia shqiptare, veçanërisht sektori i shërbimeve. Më tej ai e cilësoi sulmin si një krim me pasoja të rënda, jo vetëm për ekonominë, por edhe për sigurinë kombëtare.

“Na duhet një institucion që të mbrojë hapësirën online. Ta mbrojë nga keqinformimi, dezinformimi, nga dhuna dhe, natyrisht, nga sulmet që po zhvillohen aty. Ajo që po ndodh në këtë hapësirë, për të cilën po flasim prej ditësh, është krim. Është krim në kushtet e një boshllëku të qartë ligjor dhe institucional.

Të sulmosh në mënyrën se si është sulmuar ekonomia shqiptare dhe dega më e rëndësishme e saj, ku 49% e ekonomisë përbëhet nga shërbimet, është një krim me pasoja të rënda për sigurinë kombëtare. Nuk synohet thjesht t’i prishet puna një biznesi apo një personi, por po tentohet të goditet dega më e rëndësishme e ekonomisë së këtij vendi”, tha mes të tjerash Braçe.