Sulmet ndaj gazetarëve, Arben Kola thirrje protestuesve: Nuk preken, mbrohen edhe nga ligjet ndërkombëtare

Aktivisti dhe bashkë-organizatori i protestës, Arben Kola u bëri thirrje protestuesëve të respektojnë gazetarët dhe të shmangin çdo akt dhune ndaj tyre, një mesazh që ai e përsëriti edhe gjatë grumbullimit në sheshin “Skënderbej”.

Në fjalën e tij, Kola theksoi se gazetarët nuk duhet të bëhen objekt sulmesh, pavarësisht mënyrës sesi raportohet një ngjarje. Ai nënvizoi se mbrojtja e tyre garantohet edhe nga ligjet ndërkombëtare, ndërsa u kërkoi qytetarëve që pakënaqësitë ndaj mediave t’i shprehin në mënyrë demokratike, përmes pankartave apo formave të tjera paqësore të protestës.

”Pavarësisht sesi është lajmi, edhe në kohë lufte, gazetarët nuk preken. Ju e dini shumë mirë që mbrohen edhe me ligjet ndërkombëtare. Kush nuk pëlqen media të caktuara, bëni pankarta, kjo është demokracia”, tha Kola.