Tabaku hedh akuza: Nafta në Shqipëri jashtë kontrollit të tregut. Është në duart e oligarkëve dhe qeverisë

Deputetja e PD-së, Jorida Tabaku akuzon qeverinë, duke thënë se po ndikon në mënyrë të drejtpërdrejtë në mbajtjen e lartë të çmimit të naftës, përmes një sistemi që sipas saj favorizon oligopolet e karburanteve.

Gjatë fjalës në seancën plenare në Kuvend, deputetja tha se ulja e propozuar e akcizës nuk zgjidh problemin real, pasi “problemi i vërtetë lidhet me modelin ekonomik të ngritur në vend”.

Tabaku theksoi se Shqipëria mbetet me çmime të larta pavarësisht tregjeve ndërkombëtare, duke deklaruar: “Nafta mund të bjerë në bursat ndërkombëtare, por në Shqipëri mbetet ndër më të shtrenjtat në Europë”.

Ajo shtoi se sistemi aktual nuk funksionon si treg i lirë: “Ky nuk është treg i lirë. Kjo është ekonomi e deformuar”. Sipas saj, mbi 60% e çmimit të karburantit përbëhet nga taksa, ndërsa barra e lartë e naftës ndikon drejtpërdrejt në koston e jetesës së qytetarëve.