Tabaku: Për kompanitë pranë qeverisë gjenden përjashtime fiskale, fermerët vijojnë të rëndohen nga TVSH-ja

Deputetja e PD-së, Jorida Tabaku, ka ngritur akuza ndaj qeverisë lidhur me politikat fiskale dhe mënyrën sesi trajtohen kompani të caktuara në raport me sektorin e bujqësisë. Tabaku sjell si shembull një nismë të qeverisë për të përfshirë në listën e makinerive të përjashtuara nga TVSH-ja edhe pajisjet që përdoren ose do të përdoren nga kompania KAYO. Sipas saj, ndërkohë që për kompani të caktuara gjenden me shpejtësi lehtësime fiskale, fermerët dhe blegtorët kanë kërkuar prej vitesh uljen e barrës së TVSH-së në bujqësi, por kërkesa e tyre është refuzuar vazhdimisht.

Postimi i plotë

Si ta kuptojmë shtetin personal? Është folur gjatë për ligjet me porosi dhe shtetin personal. Megjithatë, ka ende qytetarë që pyesin se si mund të dallohet një politikë e tillë.
Ja një shembull i freskët. Pak javë më parë, qeveria ndërmori një nismë për të përfshirë në listën e makinerive të përjashtuara nga TVSH-ja edhe ato që përdoren ose do të përdoren nga kompania KAYO.

Ndërkohë, prej më shumë se një mandati, fermerët dhe blegtorët kërkojnë lehtësimin e TVSH-së për bujqësinë—një sektor që përbën rreth 15% të PBB-së, punëson një pjesë të madhe të shqiptarëve dhe po përjeton një nga rëniet më të forta në ekonominë tonë. Në çdo diskutim në Komisionin për Ekonominë dhe Financat, ministrat përgjegjës për bujqësinë e kanë refuzuar këtë kërkesë.

Për bujqit nuk gjendet zgjidhje. Për kompanitë pranë oborrit qeveritar gjenden menjëherë përjashtime fiskale, status investitori strategjik dhe tokë publike. Vendet e rajonit aplikojnë norma më të ulëta për produktet e shportës ushqimore, duke i bërë prodhuesit e tyre më konkurrues. Qeveria socialiste, përkundrazi, vazhdon t’i rëndojë fermerët me TVSH, të dobësojë produktet “Made in Albania” dhe të ushqejë informalitetin.

Një qeveri në krah të një pakice të privilegjuar dhe kundër shumicës së harruar. Ky është shteti personal. Ky është sistemi socialist.