Kryetari i Grupit Parlamentar të Partisë Socialiste, Taulant Balla, në seancën e sotme plenare iu përgjigj akuzave të opozitës, e cila pretendon se mazhoranca ka shkrirë Komisionin e Integrimit.
Balla tha se ky komision nuk është shkrirë, por është bashkuar te Politika e Jashtme.
“U kam dëgjuar me shumë vëmendje, që keni thënë se kemi shkrirë Komisionin e Integrimit. Nuk e kemi shkrirë Komisionin e Integrimit. Përkundrazi, e kemi bashkuar me Komisionin e Politikës së Jashtme, për të formuar Komisionin për Europën sepse kjo parti, Edi Rama dhe PS janë votuar pikërisht për këtë vizion.
Ndërkohë që ju Evropën nuk e kishit fare pjesë të diskursit dhe të angazhimit tuaj politik në fushatën e fundit. Ne jemi votuar për Evropën dhe punët e Evropës padyshim duhet t’i bëjmë bashkë me ju dhe të punojmë për realizimin e kësaj aspirate historike, Shqipëria në BE.
Nëse doni të jeni pjesë e kësaj, bujrum votoni ndryshimet e propozuara”, tha Balla.