Kryetari i Bashkisë Himarë, Vangjel Tavo ka reaguar ndaj pretendimeve se zjarret e fundit në zonë mund të kenë lidhje me Paketën e Maleve, duke dhënë detaje edhe për situatën e krijuar dhe dëmet e shkaktuara nga flakët. Tavo tha se strukturat e bashkisë kanë nisur evidentimin e dëmeve. Sipas tij, deri tani janë konstatuar dëme në gjashtë banesa, tre prej të cilave të banuara dhe tre të pabanuara.
”Sot, është bërë një evidentim paraprak i dëmeve që kanë lënë zjarret dhe të gjitha strukturat e bashkisë janë në terren për të evidentuar çdo dëm që kanë pësuar banorët dhe më pas për të vazhduar me vlerësimin dhe kompensimin”, deklaroi Tavo. Ai bëri të ditur se procesi i verifikimit po vijon edhe për dëmet në sektorin bujqësor, ndërsa brenda pak ditësh pritet të jetë e qartë panorama e plotë.
”Brenda pak ditëve do të kemi përfunduar dhe do të kemi një panoramë më të qartë të dëmeve në ullishte dhe pemë frutore, se për dëmet në banesa kemi përfunduar konstatimin. Janë 3 shtëpi të banuara dhe 3 të pabanuara. Tani po vlerësojmë dëmet që kanë ndodhur në pemët frutore dhe ullishte. Një park me bletë gjithashtu është dëmtuar”, tha kryebashkiaku.
Sipas Tavos, konstatimi përfundimtar i dëmeve pritet të përfundojë brenda tre ditësh, ndërsa vlerësimi i plotë do të jetë gati deri në fund të javës. Ai theksoi se bashkia do të përdorë fondin e emergjencave për të mbështetur banorët e prekur. ”Puna vazhdon, brenda 3 ditëve do të kemi konstatimin përfundimtar dhe deri në fund të javës vlerësimin përfundimtar. Ne do të kemi fondin e emergjencave që do të vihet në dispozicion të kompensimit të qytetarëve që kanë pësuar dëme”, u shpreh Tavo në ”Report TV”.
Kryebashkiaku shtoi se edhe bizneset e zonës janë angazhuar për të ndihmuar familjet e prekura nga zjarret. “Shumica e bizneseve të zonës janë ofruar për të mbështetur familjet që pësuan dëme”, tha ai. I pyetur nëse është e nevojshme rritja e buxhetit për emergjencat civile, kreu i Bashkisë Himarë tha se fondi aktual është i mjaftueshëm. Sipas tij, fondi përcaktohet në bazë të të ardhurave të bashkisë, ndërsa në rast nevoje mund të përdoret edhe fondi i akorduar nga qeveria.