“Territorialja”, ambasadori i BE pas takimit me Maznikun e Boçin: Reformë gjithëpërfshirëse dhe konsensus i gjerë

Ambasadori i BE-së në Tiranë, Silvio Gonzato e ka konsideruar si konstruktiv takimin e zhvilluar sot me bashkëkryetarët e Komisionit të Posaçëm për Reformën Territoriale dhe Administrative, Arbjan Maznikun dhe Luçiano Boçin. Gonzato thekson rëndësinë e një reforme gjithëpërfshirëse dhe plotësisht transparente, si dhe arritjen e një konsensusi të gjerë.

“Takim konstruktiv sot me bashkëkryetarët Arbjan Mazniku dhe Luçiano Boçi të Komisionit të Posaçëm për Reformën Territoriale dhe Administrative në Kuvendin e Shqipërisë. Ambasadori i BE-së, Silvio Gonzato, theksoi rëndësinë e një reforme gjithëpërfshirëse dhe plotësisht transparente, të ndërtuar mbi të dhëna të sakta dhe konsensus të gjerë.

Shpejtësia e reformave nuk mund të vijë në kurriz të cilësisë dhe rritja e efikasitetit nuk mund të vijë në kurriz të demokracisë vendore. Njëkohësisht, është e rëndësishme që funksionet të shoqërohen me financim të mjaftueshëm, në mënyrë që autoritetet vendore të kenë autonomi reale në vendimmarrje, të mbështetur nga kapacitetet e nevojshme. Mbetet thelbësore që reforma të sjellë shërbime më të mira për qytetarët dhe të jetë në përputhje me standardet evropiane”, thuhet në reagim.