Turisti zviceran i bashkohet protestës për Zvërnecin: Zhvillimi dhe natyra duhet të ecin dorë për dore

Mes qytetarëve në protestën e radhës në Korçë kundër projektit në Zvërnec është edhe një turist nga Zvicra. Ai tha se ka ardhur në vendin tonë për pushime, se i pëlqen të vizitojë Shqipërinë nga veriu në jug dhe dëshiron të mbështesë qytetarët e Korçës në protestën e tyre. Turisti shtoi se shpreson që qytetarët të kenë mundësi të shprehin mendimin e tyre për projektin dhe që çdo proces të zhvillohet në përputhje me ligjin

”Për mua është dita e tretë që jam në Korçë. Unë nuk kam të drejtë të protestoj në një shtet të huaj, por unë jam këtu për të mbështetur njerëzit këtu. Dje unë isha në liqenin e Prespës së Vogël, dhe dje kam parë duke fluturuar pelikanët, dhe ishte diçka jashtëzakonisht shumë e bukur. Dhe vitin e kaluar unë isha në Zvërnec dhe atje unë kam parë pelikanët. Dhe është një natyrë shumë e bukur, ka shumë vende në Shqipëri që janë shumë të bukura.

Në Zvicer ne kemi mësuar që zhvillimi ekonomik dhe mbrojtja e natyrës duhet të shkojnë dorë për dore, dhe në një nivel që të dyja nuk duhet të jenë të kundërta, se të dyja janë shumë të rëndësishme. Për këtë arsye unë shpresoj që Shqipëria ka mundësi të shkojë me ligj dhe ndoshta ky projekt të shkojë me ligj. Nesër unë shkoj në bregdet, e ndoshta unë do të jem në vende të tjera, ose në Tiranë”.