Veliaj i kërkon Kuvendit pezullimin e draftit: Bashkimi i Rinasit me Tiranën kërkon vlerësim të plotë

Kryetari i Bashkisë së Tiranës, Erion Veliaj, i është drejtuar me letër Kuvendit, duke kërkuar pezullimin e shqyrtimit të draftit për ndarjen territoriale që parashikon përfshirjen e Rinasit, Bërxullës dhe Domjes në Bashkinë e Tiranës. Në kërkesën e tij, Veliaj argumenton se drafti nuk është konsultuar me Bashkinë e Tiranës dhe se nuk është marrë në konsideratë as qëndrimi i tij. Kjo vjen në një kohë kur ai nuk ka mundur të marrë pjesë në mbledhje, pasi SPAK nuk e ka lejuar pjesëmarrjen e tij.

Sa i përket veçanërisht përfshirjes së njësisë administrative “Rinas” në Bashkinë e Tiranës, Veliaj kërkon që përpara vijimit të procedurës të paraqitet një vlerësim i plotë i ndikimit të ndryshimit territorial. Vlerësimi duhet të përfshijë aspektet territoriale, demografike, administrative dhe financiare, si dhe të dhëna për pasuritë, detyrimet, personelin, të ardhurat dhe shpenzimet.

Veliaj kërkon gjithashtu që të merret në konsideratë mënyra se si do të garantohet vazhdimësia e shërbimeve publike për banorët e zonave që parashikohet t’i bashkohen Bashkisë së Tiranës. Përpara vijimit të procesit dhe miratimit përfundimtar të hartës së re, konsideroj të nevojshme që:

1. Të pezullohet vijimi i shqyrtimit përfundimtar të projektligjit deri në zhvillimin dhe dokumentimin e konsultimit real, paraprak dhe efektiv të popullsive të prekura, në një fazë kur rezultatet e tij mund të sjellin rishikimin e zgjidhjes territoriale;

2. Të bëhen publike metodologjia e konsultimit, informacioni i vënë në dispozicion të qytetarëve, pjesëmarrja, qëndrimet e shprehura dhe mënyra se si ato janë reflektuar ose arsyet e mosreflektimit të tyre;

3. Në rastin e Bashkisë Tiranë, të krijohen kushtet që procesi institucional të zhvillohet plotësisht, duke përfshirë mendimin e Kryetarit, shqyrtimin e informuar nga Këshilli Bashkiak dhe konsultimin real të qytetarëve;

4. Për përfshirjen e njësisë administrative “Rinas” në Bashkinë Tiranë, të paraqitet vlerësimi i plotë territorial, demografik, administrativ dhe financiar, përfshirë pasurinë, detyrimet, personelin, të ardhurat, shpenzimet dhe vazhdimësinë e shërbimeve publike;

5. Të harmonizohet projektligji territorial me ndryshimet e nevojshme në ligjin nr. 139/2015 dhe të përfshihen në dispozita detyruese statusi juridik i “qytetit”, funksionet, organizimi, financimi dhe garancitë e shërbimeve;

6. Të përcaktohet mekanizëm juridik dhe zgjedhor i përfaqësimit proporcional të qyteteve, duke garantuar barazinë e votës dhe përfaqësimin e banorëve të fshatrave dhe njësive administrative;

7. Të harmonizohet neni 3 i projektligjit me nenin 92 të ligjit nr. 139/2015 dhe të rregullohet qartë administrimi i periudhës kalimtare, përfshirë organet kompetente, pasuritë, detyrimet, buxhetet, personelin dhe ofrimin e shërbimeve;

8. Të dokumentohet, për çdo ndryshim konkret territorial, përmbushja e kritereve materiale të nenit 108, pika 2, të Kushtetutës dhe nenit 86, të ligjit nr. 139/2015;

9. Të përcaktohet shprehimisht se kompetenca e këshillave bashkiakë për riorganizimin e njësive administrative kufizohet brenda territorit të bashkisë dhe nuk përfshin ndryshimin e kufijve të jashtëm ose transferimin e territorit ndërmjet bashkive.