Kreu i Lëvizjes “Shqipëria Bëhet”, Adriatik Lapaj ka ngritur shqetësime lidhur me menaxhimin e sektorit të naftës në vend, duke deklaruar se pasuritë natyrore nuk po shfrytëzohen në mënyrë efikase në interes të qytetarëve.
Në një deklaratë dhe video të publikuar prej tij, Lapaj thotë se pavarësisht potencialit të vendburimeve të naftës në zona si Kuçova, qytetarët shqiptarë vijojnë të përballen me çmime të larta të karburantit, të cilat sipas tij nuk reflektojnë pasurinë vendase.
Ai ngriti kritika ndaj administrimit të sektorit nga institucionet përgjegjëse, duke përmendur edhe kompaninë shtetërore Albpetrol, për të cilën pretendon se ka probleme në menaxhimin e burimeve natyrore. Lapaj gjithashtu rikujtoi premtimet e bëra në të kaluarën për ringritjen e industrisë së naftës në vend, duke vlerësuar se këto objektiva nuk janë përmbushur.
