VIDEO/ Patrullime shqiptaro-italiane në Durrës, ministri Lamallari: Garanci për qytetarët dhe turistët

Patrullimet e përbashkëta të Policisë së Shtetit me Policinë italiane në Durrës po vijojnë gjatë sezonit turistik. Ministri i Brendshëm, Besfort Lamallari teksa ka ndarë pamjet, thotë se prania e përbashkët e forcave të policisë synon të garantojë më shumë siguri për qytetarët dhe turistët që kanë zgjedhur Shqipërinë si destinacion pushimesh, përfshirë turistët italianë.

Krahas masave për parandalimin e veprimtarive të paligjshme, policia po kryen kontrolle edhe për respektimin e niveleve të lejuara të zhurmave në bare, restorante dhe ambiente të tjera argëtimi. Lamallari theksoi se respektimi i rregullave për sigurinë dhe qetësinë publike është pjesë e rëndësishme e zhvillimit të një turizmi të qëndrueshëm.

”Patrullimet e përbashkëta të Policisë së Shtetit me policinë italiane në Durrës janë një garanci më shumë për qytetarët dhe turistët që kanë zgjedhur Shqipërinë, përfshi ata italianë. Krahas parandalimit të paligjshmërive dhe rritjes së sigurisë publike, po ushtrohen gjithashtu kontrolle edhe për respektimin e nivelit të lejuar të zhurmave nga baret, restorantet dhe ambientet e tjera të argëtimit. Respekti për normat e përbashkëta, përfshi ato për sigurinë e turistëve apo qetësinë e tyre nga zhurmat përtej niveleve të lejuara i shërben një turizmi të qëndrueshëm dhe që rritet nga viti në vit”,-shkruan Lamallari.