Kryeministri Edi Rama, në podcastin ”Flasim Shqip” me gazetaren Rudina Xhunga, foli për fëmijërinë e tij, duke mohuar aludimet se ka qenë i bullizuar dhe duke treguar dy raste kur është dhunuar fizikisht.
Rama tha se që i vogël ka qenë rebel dhe nuk i ka pranuar kufijtë e vendosur nga të tjerët. ”Unë që fare i vogël, nuk i pranoja kufijtë si imponim apo si fat. Përpiqesha gjithmonë t’i shkelja, t’i shtyja”,-tha Rama.
Ai theksoi se nuk ka qenë viktimë bullizmi, por ka përjetuar dy episode dhune. “Kam në jetën time dy rrahje, ku nuk kam rrahur, por më kanë rrahur”. Sipas Ramës, rasti i parë ka ndodhur pas një ndeshjeje të Partizanit me Apoloninë, kur, pas tensioneve në fushë, ai u rrethua nga disa persona dhe u godit. Rasti i dytë ishte në janar të vitit 1997, kur, sipas tij, iu bë pritë pranë hyrjes së banesës.
Rama iu përgjigj edhe deklaratave të Sali Berishës se në momentin e dhunimit në vitin 1997 ai ndodhej me një burrë. “Jo vetëm që s’ka pasur lidhje me krim pasioni dhe s’kam qenë me një burrë, por kam qenë me një vajzë që bashkëjetoja dhe me një shok që jetonte në apartamentin tonë”.
Kryeministri tha gjithashtu se njëri prej personave që e kishte dhunuar më parë është penduar dhe ka ndërruar jetë, ndërsa tjetri, sipas tij, ka shfaqur pendesë në një mënyrë tjetër.