Vizitë 3-ditore në Gjermani, Tabaku thekson nevojën për reforma dhe rritje të besimit të investitorëve

Pas një vizite 3-ditore në Gjermani me ftesë të qeverisë gjermane, deputetja e PD-së, Jorida Tabaku ka bërë të ditur se aktivitetet e ditës së fundit u përmbyllën me një sërë takimesh të rëndësishme institucionale dhe politike.

Sipas saj, delegacioni shqiptar zhvilloi bisedime në Ministrinë e Jashtme gjermane, në Zyrën e Kancelarit, si dhe me përfaqësues të shoqatave të biznesit. Po ashtu, takime u mbajtën edhe në Komisionin për Politikën e Jashtme dhe Çështjet Europiane në Bundestag, si dhe me politikanë dhe figura të rëndësishme të politikës gjermane.

Në këto takime, sipas Tabakut, u theksua qartë se Shqipëria ka nevojë për reforma reale, jo vetëm për të avancuar në procesin e anëtarësimit në Bashkimin Europian, por edhe për të shfrytëzuar potencialin e saj gjeostrategjik dhe ekonomik në një Europë që po ndryshon me shpejtësi.

Postimi i plotë

Në përfundim të një vizite tre ditore në Gjermani, në Ministrinë e Jashtme ku diskutuam për procesin e integrimit, problemet kryesore që hasin shqiptarët, që hasin bizneset, lidhen sigurisht me ligjin, lidhen me zbatimin e ligjit, luftën kundër korrupsionit.

Por më e rëndësishmja është qëndrimi i qeverisë Gjermane. Gjermania ka qenë mbrojtësja kryesore e këtij procesi, shtytësja kryesore e Procesit të Berlinit dhe e bën këtë për Shqipërinë dhe për shqiptarët, duke pasur parasysh që integrimi është projekti më i rëndësishëm.

Këto tema sigurisht janë tema të politikës, por janë tema edhe të jetës së qytetarëve shqiptarë, sepse procesi i integrimit është i vetmi proces që do e ndryshojë Shqipërinë.