Në interpelancën e thirrur nga deputetët lidhur me operacionin që rezultoi në vrasjen e efektivit Enea Mekolli në krye të detyrës dhe plagosjen e Edison Adrit, ministri i Brendshëm, Besfort Lamallari konfirmoi vetëm nisjen e hetimit administrativ nga Drejtoria e Policisë dhe Agjencia e Mbikëqyrjes Policore, për të cilin nënvizoi se duhet të jetë shterues.
“Do të doja shumë të kisha një përgjigje në këtë moment, por mund t’i përgjigjem vetëm hetimit administrativ. Ka nisur një hetim i tillë, si nga Drejtoria e Policisë, ashtu edhe AMP. Vetëm përfundimi i këtij vhetimi në mënyrë sa më të potë, shteruese, pa ndikim politik që mund tu japë përgjigje pyetjeve. Nuk mund të përfshihem me komente, derisa të përfundojë hetimi, i cili do të jetë i plotë, sepse bëhet fjalë për t’i dhënë drejtësi një efektivi që nuk është më mes nesh”, tha Lamallari.
Deputeti i PD-së, Klevis Balliu tha se autori, Violand Braçellari, ishte me rrezikshmëri të lartë, ndërsa hodhi dyshime për dekonspirim të operacionit. ”Nuk është e vërtetë që s’mund të jepni përgjigje. Çdokush nga ministrat mund të japë përgjigje. Ai ishte njeri me rrezikshmëri të lartë. Ai operacion është komanduar, urdhëruar në mënyrën më të gabuar, nga njerëz që nuk meritojnë të jenë në ato funksione që kanë sepse kanë shkuar si militantë partie, kanë shkuar atje për të promovuar shërbime politike me uniforma. Për interesa monetare është inkriminuar Policia e Shtetit”, tha Balliu.
