Vrasja në varrezat e Sharrës, prangoset një nga autorët

Një person i dyshuar si bashkëpunëtor në vrasjen e dy ditëve më parë, ngjarje që ndodhi në varrezat e Sharrës në kryeqytet, është arrestuar dje nga policia e Tiranës. Në pranga ra Jurgen Gjuzja,19 vjeç, banues në Tiranë, ndërsa po punohet për kapjen e Ergert Tafa, 25 vjeç, edhe ai banues në kryeqytet. Sipas policisë, Gjuzja dhe Tafa dyshohet se dje rreth orës 14.30 të dy ditëve më parë, në varrezat e Sharrës, kanë qëlluar me armë zjarri 38 vjeçarin Altin Çullhaj. Ky i fundit, banues në Tiranë, ishte punonjës i një agjencie shërbimi funeralesh në kryeqytet. Çullhaj, si pasojë e plagëve të marra, ka gjetur më pas vdekjen në spital. Policia tha se në cilësinë e provës materiale u sekuestruan 3 gëzhoja, ndërsa i ndjeri ishte baba i dy djemve, në moshë të vogël. Viktima Altin Çullhaj jetonte me familjen e tij në Pezë, kurse në Sharrë punonte bashkë me vëllanë pasi ky i fundit kishte një agjenci varrimi. Mësohet se ai ka pasur një debat me dy të rinjtë, banues në afërsi të Sharrës, për punimet, ndërkohë që nuk përjashtohet mundësia e një konflikti më herët mes tyre dhe sherri ishte pretekst për ë kryer krimin. Dëshmitarët thanë se në momentin para vrasjes, viktima ishte bashkë me një person tjetër duke kryer punime në një varrezë të Sharrës. Fillimisht pranë tyre ka shkuar nipi i Ergert Tafës dhe është konfliktuar me Altinin. Ky i fundit ka vazhduar punën, por më pas ka ardhur Tafa, i cili pasi ka folur me të, iu afrua me armën në dorë dhe e qëlloi, duke i marrë jetën. Banorët në vendngjarje thanë se mes viktimës dhe autorit kishte pasur konflikt të mëparshëm për një femër të fisit të Tafës.