Xhuvani del në gjyq, kërkon t’i shpëtojë burgut përjetë

Konstandin Xhuvani doli për herë të parë në një seancë gjyqësore dhe pranoi autorësinë e vrasjes së katërfishtë, ngjarje e ndodhur në orët e para të mëngjesit të 4 nëntorit, por kërkoi gjykim të shkurtuar, me qëllim për t’i shpëtuar masës së dënimit me burg të përjetshëm. Kërkesa e Xhuvanit u paraqit nga vete i pandehuri, që ndryshe nga seanca e kaluar ishte dje në seancën e radhës gjyqësore, por nuk ishte i pranishëm avokati i tij mbrojtës. Kërkesën e të pandehurit e kundërshtoi prokurori i çështjes, i cili argumentoi para trupit gjykues arsyet, se pse nuk duhet pranuar gjykimi i shkurtuar për të si i akuzuar me dashje mbi vrasjen e katërfishtë, të paktën mbi dy persona. Pasi dëgjoi pretendimet e palëve trupi gjykues kërkoi nga prokurori të sjellë prova të reja, të pa administruara në dosje, qe të shprehet më pas mbi kërkesën e Xhuvanit. Mbrojtja e tij pretendon se Xhuvani e ka kryer krimin në kushte të rënda psikologjike dhe psikike, ndërkohë që seanca e radhës është caktuar për më 15 janar. Ndërkohë në sallën e gjyqit mungonin edhe dje familjarët e të pandehurit. Të pranishëm ishin dy shokë të tij. Për një krim të kryer më parë Xhuvani ishte dënuar me dy vjet heqje lirie, ndërsa  në mëngjesin 4 nëntorit, brenda lokalit “Ante Grand”, ai ekzekutoi 4 persona, dy prej të cilëve, sipas akuzës, në mënyrë të pavullnetshme. Mes tyre 26-vjeçari Xhuvani vrau pa dashje edhe shokun e tij, Arbër Demiraj, si dhe italianin Giampaolo Azzolo, i cili ndodhej në atë lokal ku ndodhi ngjarja e rëndë. Dy viktima të kësaj ngjarje, Edison Jaho dhe Enea Xhaji ishin në shënjestër të Kostandin Xhuvanit, pas një konflikti që lindi mes tyre.