Zgjedhje të parakohshme? Ilir Alimehmeti: S’ka zgjidhje tjetër, Rama duhet të largohet

Këshilltari i PD-së në Bashkinë e Tiranës, Ilir Alimehmeti thotë se zhvillimi i zgjedhjeve të parakohshme mbetet mënyra e vetme për të testuar mbështetjen qytetare pas 36 ditëve protestë para Kryeministrisë.

Ai nënvizon se kërkesa kryesore që bashkon të gjitha grupimet pjesëmarrëse në protestë është dorëheqja e kryeministrit Edi Rama. Alimehmeti tha se ky është objektivi i përbashkët i protestuesve, duke shtuar se, sipas vlerësimit të tij, lëvizja është më pranë arritjes së këtij synimi sesa në ditën kur nisi protesta.

”Kërkesa që i bashkon të gjithë rrymat në protestë është dorëheqja e Edi Ramës. Kam parë një pankartë që ishte më domethënësja: “Bashkë deri sa dorëheqja të na ndajë”. Edi Rama duhet të largohet, në këtë emërues të përbashkët janë të gjitha forcat aty, dhe është rezistencë e madhe. Janë më afër objektivit se sa nga dita që e nisën’‘,-tha në ”A2cnn”.