Prefekti i Qarkut Tiranë, Shkëlqim Hajdari, ka zhvilluar një takim me drejtuesit e strukturave të emergjencave civile dhe institucioneve përgjegjëse për menaxhimin e situatave të zjarreve, në kuadër të masave parandaluese gjatë kësaj periudhe me rrezik të shtuar.
Në një reagim të publikuar në rrjetet sociale, Hajdari ka falënderuar strukturat për punën e bërë deri tani, ndërsa ka kërkuar rritjen e masave mbrojtëse dhe angazhimin maksimal të të gjitha institucioneve në terren.
Në takim morën pjesë Drejtori i Përgjithshëm i Emergjencave Civile në Bashkinë e Tiranës, Dritan Dango, Drejtori i MZSH Tiranë, Shkëlqim Goxha, Drejtori i Policisë së Tiranës, Oligert Torba, Drejtori i ADZM-së, Albion Kurti, Zëvendësdrejtori i Agjencisë së Pyjeve, Edison Dardha, si dhe administratorët e njësive administrative që mbulojnë zonat pyjore.
Një prej pikave kryesore të takimit ishte forcimi i reagimit në terren. Sipas Hajdarit, drejtuesit e njësive vendore dhe grupet vullnetare duhet të jenë të parët që sinjalizojnë dhe ndërhyjnë pranë çdo vatre zjarri që shfaqet.
“Rreziku nga zjarret është i shtuar në këtë periudhë”, theksohet në reagimin e Prefektit, duke kërkuar angazhim të plotë të të gjitha strukturave, veçanërisht në zonat pyjore dhe ato të identifikuara me risk të lartë.
Në kuadër të masave të reja, është vendosur monitorim i pandërprerë, 24 orë në ditë, i territorit të Qarkut Tiranë, raportim në kohë reale dhe gatishmëri e plotë e shërbimeve zjarrfikëse.
Policia e Shtetit do të vijojë kontrollet në terren, ndërsa strukturat e ADZM-së do të fokusohen në monitorimin e zonave me risk mjedisor.
Hajdari ka nënvizuar gjithashtu rëndësinë e bashkëpunimit ndërinstitucional dhe reagimit të shpejtë, duke kërkuar që komuniteti të informohet në mënyrë të vazhdueshme nga administratat vendore.
“Parandalimi i zjarreve mbetet përgjegjësi e përbashkët institucionale dhe qytetare”, shprehet Prefekti, duke bërë thirrje për angazhim të të gjithëve në mbrojtjen e zonave pyjore, pronës dhe jetës së qytetarëve.
Qarku Tiranë do të vijojë të jetë në gatishmëri të plotë dhe monitorimi i situatës do të kryhet në mënyrë të pandërprerë gjatë gjithë kësaj periudhe.