Zv/ministri i Brendshëm, Xhemal Qefalia thotë se Agjencia e Mbikëqyrjes Policore (AMP) ka pezulluar efektivët që kanë tejkaluar kompetencat gjatë protestave në Tiranë. Ai dënoi dhunën nga të dyja palët, duke theksuar se policia dhe protestuesit nuk duhet ta shohin njëri-tjetrin si kundërshtarë. Qefalia ngriti shqetësimin për dyfishimin e numrit të efektivëve të dëmtuar gjatë përplasjeve, ndërsa argumentoi se detyra e policisë është të garantojë sigurinë e qytetarëve dhe të mbrojë institucionet shtetërore.
“Në këtë organizatë të policisë, që ka 12 mijë vetë, mund të ketë individë që kanë ceduar në tejkalimin e kompetencave dhe AMP ka kryer detyrën duke pezulluar ata punonjës që kanë tejkaluar forcën”, u shpreh ai. Një tjetër çështje e ngritur nga zëvendësministri ishte përfshirja e të miturve në protestat e dhunshme. Ai theksoi se goditja e tyre nuk mund të justifikohet, por kërkoi që fëmijët të mos përfshihen në përplasje me policinë.
“Nuk kemi thënë që është e drejtë të goditet një i mitur”, deklaroi Qefalia, duke bërë thirrje për shmangien e konfrontimeve. Në përfundim, ai theksoi se shqetësimet e studentëve dhe qytetarëve duhet të adresohen përmes dialogut, ndërsa nënvizoi se e drejta për të protestuar nuk duhet të shndërrohet në dhunë. “Ka 1001 probleme që mund të jenë të vërteta, por duke dialoguar mund të arrihet në rezultate”, u shpreh ai, duke shtuar se “nuk ndodh rotacioni politik me dhunë”.
