Zv/ndihmës sekretari i Shtetit: Me Shqipërinë për të luftuar organizatat kriminale dhe për të rritur praninë e kompanive amerikane

Zëvendësndihmës Sekretari amerikan i Shtetit, Daniel Lawton, deklaroi se Shtetet e Bashkuara po bashkëpunojnë ngushtë me autoritetet shqiptare për goditjen e organizatave kriminale transnacionale, ndërsa synojnë edhe zgjerimin e pranisë së kompanive amerikane në tregun shqiptar.

Duke dëshmuar para Nënkomitetit për Evropën të Komitetit të Punëve të Jashtme në Dhomën e Përfaqësuesve, Lawton prezantoi qasjen e administratës së Donald Trump për Ballkanin Perëndimor. “Ne po punojmë ngushtë me aleatin tonë të NATO-s, Shqipërinë, për të goditur organizatat kriminale transnacionale dhe për të zgjeruar qasjen e kompanive amerikane në treg”, deklaroi ai.

Lawton theksoi gjithashtu se një hua e miratuar së fundmi përmes Financimit të Huaj Ushtarak do të ndihmojë Shqipërinë në përmbushjen e angazhimeve të NATO-s për mbrojtjen dhe në rritjen e blerjeve të pajisjeve të prodhuara në SHBA.

Sa i përket rajonit, zyrtari amerikan tha se Uashingtoni synon një Ballkan Perëndimor “të qëndrueshëm, paqësor dhe të begatë”, duke vendosur në fokus forcimin e sigurisë, bashkëpunimin ekonomik dhe luftën kundër krimit të organizuar.

Lawton konfirmoi gjithashtu mbështetjen e SHBA-së për sovranitetin e Bosnje-Hercegovinës dhe pavarësinë e Kosovës, ndërsa u bëri thirrje Prishtinës dhe Beogradit të shmangin provokimet dhe të rikthehen në dialog. Strategjia amerikane për rajonin mbështetet në tri prioritete: ruajtjen e stabilitetit, forcimin e interesave ekonomike amerikane dhe luftën kundër kërcënimeve të sigurisë.