Aktivitete në promovim të turizmit në qytetin e Beratit

Në qytetin e Beratit u organizua një tryezë e rrumbullakët me bizneset turistike, për promovimin e Qendrës së Interpretimit Turistik në qendër të qytetit si  dhe prezantimin e Markës së Turizmit  me qëllim koordinimim dhe promovimin e bizneseve turistike të qytetit, edhe me anë të aplikacionit celular -Visit Berat.

Takimi u zhvillua së bashku me partnerët e Bashkisë Berat, projektit Risi Albania dhe Albania Rafting Group.

Berati është një qytet i vizitueshëm në çdo stinë dhe nevoja e guidave turistike bëhet e domosdoshme.

Ky qytet nuk vizitohet vetëm për arkitekturën e tij të veçantë,për historinë e tij të lashtë, kishat e shumta dhe të pikturuara nga piktorë me emër si Onufri, por edhe per gastronominë karakteristike,natyrën e bukur dhe sportet ujore në rrjedhën e lumit Osum.

Ky lum deri në lartësitë e Skraparit është i mbushur me kanione të shumta që mundësojnë sportin e raftingut.

Kjo është periudha kur aventurierët e këtyre sporteve nisen drejt këtij destinacioni.