Batuta e Edi Ramës në samit që po “thyen” rrjetin

Samiti i Sofjes duket se e ka lënë të frustruar kryeministrin Edi Rama.

Liderët e Bashkimit Europian nuk deklaruan asgjë konkrete për integrimin, duke premtuar vetëm se e ardhmja e Ballkanit është në BE.

Dreka me liderët e BE-së duket se ka qenë e tensionuar dhe këtë e pranon edhe vetë Edi Rama, pasi u shpreh se ishte si një luftë.

“Elefanti ishte në dhomë, kështu që duhej të flisnim për të,” tha Rama për “The Guardian”.

Rama e krahasoi angazhimin e mjegullt të BE-së për Ballkanin me premtimin komunist për të ardhmen e shndritshme, që ishte aty afër.

“Ne jetuam për 50 vite me një horizont të kuq, që nuk e arritëm kurrë. Nuk duam të jetojmë me një horizont blu tani,” ka deklaruar Rama.

Muajin që vjen, vendet e BE do të vendosin nëse do hapen negociatat me Shqipërinë dhe Maqedoninë.

Vendet skeptike janë Franca, Gjermania dhe Holanda. Me kryeministrin e Holandës, Rama pati edhe një takim.