Borë në mes të vjeshtës, zbardhen majat e maleve në Kukës dhe Prizren

Edhe pse jemi në Vjeshtë, në Malet e Kukësit janë regjistruan reshjet e para të dëborës, duke dhënë sinjalin se dimri në verilindje mund të vijë shpejt. Reshjet e shiut të tre ditëve të fundit ndërkohë kanë përmirësuar situatën hidrike në kaskadën e Drinit.

Bora e parë zbardhi majat e Gjallicës dhe Koritnikut në Kukës.

Reshjet e para u regjistruan edhe në Malet e Sharrit në Kosovë.

Zyrtarisht jemi në Shtator, por dimri dha shenja se do të trokasë shpejt në verilindje.

Edhe pse të pakta, reshjet e dëborës u regjistruan pas mesnate, kur temperaturat shënuan rënie të ndjeshme pas ndërprerjes së reshjeve të shiut.

Stuhia nga ana tjetër veç problematikave në infrastrukturë dha ndikim pozitiv në përmirësimin e situatës në kaskadën e Drinit.

Prurjet e lumenjve që furnizojnë Liqenin e Fierzës arritën në 240 metër kub ujë në sekondë.

Kuota e liqenit ka arritur në 272,8 metra mbi nivelin e detit e me tendence rritjeje në orët e ditët ne vijim.

Reshjet e tre ditëve ishin të parat pas në një vere të pazakontë me thatësirë të tejzgjatur e cila karakterizoi edhe pjesën e parë të Shtatorit.

Sipas parashikimit të meteorologëve, reshjet me intensitet deri mesatar në formën e shtrëngatave afatshkurtër do të vijojnë edhe përgjatë të dielës në disa zona të vendit.