Miratohet projekti për rikonstruksionin e plotë të Teatrit të Operës e Baletit

Këshilli Kombëtar i Territorit miratoi projektin e plotë të rikonstruksionit të Teatrit të Operës e Baletit. Kjo është njoftuar nga ministrja e Kulturës, Mirela Kumbaro, e cila në Facebook sqaron se: “Pas muajve të gjatë pune të lodhshme dhe ekspertize të vështirë të 3 studiove shqiptare dhe europiane, Këshilli Kombëtar i Territorit miratoi projektin e plotë të rikonstruksionit të Teatrit të Operës në Tiranë”.

Kumbaro shton se pas pushimeve projekti i prezantohet publikut. “Faleminderit trupave të artistëve për këshillimet që përmirësuan projektin e “shtëpisë” së tyre. Gati për hapin tjetër drejt kantierit”, përfundon Kumbaro. Mesazhin për projektin e Teatrit të Operës, ministrja e shoqëron me një seri fotosh, të vendimit të Këshillit të Territorit dhe asaj çka pritet të shndërrohet institucioni i vetëm i këtij lloji në Shqipëri. Gjithashtu, Këshilli Kombëtar i Territorit miratoi projektin e plotë të rikonstruksionit të Bibliotekës Kombëtare të Shqipërisë.