Sot në TOB, soprano Ramona Tullumani me operan “La Boheme”

Soprano Ramona Tullumani do të jetë ditën e sotme në orën 19:00, në skenën e Teatrit të Operas dhe Baletit, në interpretimin e rolit të Musetës, në operan “La Boheme”. Opera me katër akte e Giacomo Puccini-t vjen për publikun shqiptar nën interpretimin e Orkestrës Sinfonike dhe korit të TKOB, nën dirigjimin e Francesco Cillufo-s. Soprano Tullumani për interpretimin e Musetës në “La Boheme” thekson se, “Roli i Musetës është shumë i bukur. Ajo është një femër shumë kapriçioze, shumë moderne, shumë e rafinuar, mundohet që veshjet e saj të jenë nga më të bukurat. Meshkujt kthejnë kokën sa herë ajo kalon nëpër rrugët e Parisit. Rolin e Musetës, unë e kam luajtur fillimisht në Itali, nën regjinë e artistes së madhe Katia Riçiarelli. Ajo krijoi një personazh shumë të veçantë te Museta, duke e bërë shumë të dallueshme diferencën e saj me Miminë, e cila është drama e vërtetë në këtë opera. “Në TKOB, opera “La Boheme” vjen me një vënie shumë interesante. Është një vënie klasike, me veshje dhe skenografi që i përshtatet kohës në të cilën kjo opera është realizuar. Pasi këndon role si Gilda e Violeta, të këndosh një rol si Museta të duket një argëtim i vërtetë, një lojë dhe një kënaqësi shumë e madhe në skenë. Është një personazh, i cili të lejon të luash me të, nuk të vendos kufij. Kjo është diçka shumë e bukur dhe e rëndësishme për një artist kur është në skenë”, shprehet Tullumani, shkruan ATSH.