Agjenda e eurokomisioneres Marta Kos në Tiranë

Komisionerja për Zgjerimin në BE, Marta Kos do të vizitojë Tiranën më 13 dhe 14 mars. Në të parën vizitë të saj në Tiranë, Kos do të zhvillojë disa takime të nivelit të lartë.

Fillimisht ajo do të ndalet në Presidencë, ku do të zhvillojë një takim me presidentin Begaj dhe po në të njëjtën ditë do të ketë një konferencë për mediat me kryeministrin Edi Rama.

Marta Kos do të takojë kryeparlamentaren Elisa Spiropali dhe nënkryetarin Agron Gjekmarkaj. Pjesë e takimit do jetë kryetarja e Këshillit të Integrimit Jorida Tabaku si dhe kreu i grupit parlamentar të PD, Gazment Bardhi.

Marta Kos në konferencën e Mynihut që u zhvillua në 16 shkurt, tha se Shqipëria i ka të gjithë kapacitetet të përmbyllë procesin e shqyrtimit të grupkapitujve të integrimit deri në vitin 2027.