Agron Gjekmarkaj: Fatos Nano, rikthimi si karikaturë

Nga Agron Gjekmarkaj

Pas 10 vitesh heshtje të përballuara me gajret Fatos Nano foli! Për të shkuarën foli dhe kur flet vetëm për të i bie që pesha në të tashmen në kohën e vërtetë si e quajnë ruset “ nastajashcjeje vremja” është e vogel, tejet e vogël!

U shfaq në emisionin e mirënjohur “Opinion” të Blendi Fevziut me mjekër dhe flokë të lyer me bojë të mirë por i ri nuk dukej më në asgjë! Edhe gromësimat i kishte të lodhura e të rrafshta, cinizmin si shpatë pa teh dhe tehu ishte shndërruar në krëhër për mjekrën e Edi Ramës!

Koha e gjatë e mosshfaqjes na kishte bërë disi nostalgjikë. Ky vendi ynē i rrotullon gjërat aq shumë e shpejt se paaftësia për seriozitet merret për liberalizëm, shitjet e posteve si ikje me vullnet, ikjet e detyruara nga zyra si tolerancë, dekadenca e banaliteti si formë demokracie, etja për xhin si shije për jetën, zhgrryerjet në buzuk kur pllakos tragjedia e vdekjeve si jetë e shijuar!

Ato që na u imponuan si elita të dala nga komunizmi në planin etik bartin shumica, të gjitha veset e “njeriut të ri “ sidomos atë me themeloren përshtatjen me pushtetin, uljen e kurrizit, dëbimin e krenarisë, përfitimet ndaj tij deri në grahmën e fundit të pashqetësuar nga mungesa e koherencës!

Që Fatos Nano kthehet në kohë fushatë e bën përpjekje të ndihmojë ish-partinë që ka drejtuar për 15 vjet e pasardhësin në drejtim në dukje ngjan e fisme!

Por kjo nuk pat ndodhur në vitin 2007 kur u mbyll me Sali Berishën në Pallatin e Zogut për ti bërë presion Edi Ramës që të futej në zgjedhjet lokale e kur ato ndodhen në krah të të ndjerit Sokol Olldashi e nxorri kokën në një mejhane kryeqytetase!

Desh të bëhej President atij vakti po Rama ia preu drutë shkurt dhe as e përcolli kur nga kulla e PS doli i shoqëruar me Ilirin!

Më herët po edhe asokohe i qarkulloi akuzat se Rama “shiste ikona të vjedhura” që rrinte me “thonj të pa prerë” e plot ojna sarkastike! Mbrëmë sulmoi Ilir Metën megjithëse diku nga 2009 i buzëqeshur i pat bërë shoferin duke ia pranuar syshkeljet!

Fatos Nano ka qenë i burgosur dhe përceptimi është që ajo kohe mbeti një njollë për demokracinë shqiptare dhe për pushtetin e Sali Berishës të atyre viteve dhe për këtë ai u dënua jo vetëm elektoralisht por edhe me revolta në vitin 1997.

Më vonë Nano akuzoi më shumë të vetët për ketë fat të keq sesa ish-Presidentin me të cilin bashkëpunoi dhe ia pranoi të gjitha favoret në periudhën e dytë të rikthimit në pushtet gjatē 2005-2013.

Mbreme u viktimizua në funksion të qëllimit për ti shërbyer Ramës i cili me gjasë do ta caktojë përgjegjës së qëndres së votimit në Farkë!!

Në këtë frymë bashkëpunimi me Berishën, Nano as shitej as blihej por ngjante i marrë me qera!

Kesisoj as në 2013 e as në 2017 nuk shpenzoi një fjalë të mirë për Edi Ramën dhe qeverisjen e tij i cili nuk ia kursente thumbat me zogëzat e këndesët e vet!

Ish-Kryeministri atje në mes të Vjenës ndoshta duke administruar ndonjë akçihane nuk merzitej shumë përsa ndonjë kanal optimizmi nga Tirana mbetej ende i hapur! Teksa sulmonte Sali Berishën tha një te vërtetë që në politikë të mban vota por harroi teksa kujtonte motet e shkuara të na përsëriste që Berisha e mundi disa herë pikërisht me vota e me to e nxorri në pension vetem 53 vjeç!

Ashtu në inat e sipër iku me një valixhe ndër duar që e kishte lidhur pas dore si të ishin kode bërthamore e jo letra e të linjëta! Nejse mënyra sesi Rama qeveris na nxiti jo pak në krahasim dhe më pak e keqja na dukej ku e ku më e mirë ! Por jo vetë Nano lëvdoi në gjithçka Edi Ramën, për mënyrën si qeveris për njerëzit me të cilët qeveris! Oh ka ndërrue stina e mota do thoshte Fishta!

Dikur Edi Rama i dërgonte letra plot patos, komplimenta e servilizëm bajat duke e konsideruar gjeni e lider të madh, duke i kërkuar falje se nëse të gjitha ato që thotë nuk janë diamant sepaku tunxh do jenë!

Mbrëmë që nata e hakmarrjes se Edi Ramës tek e pa Fatos Nanon që të tilla letra t’ia bënte publikisht, ta admironte, ta mbronte, ta justIkonte sikur dikush nga shpia i fliste me kufje në vesh, vazhdo kështu se na duhet ca leje ndërtimi, përbaltu, sfilitu, vuaj se gëzimi që na pret do jetë shpagues!

Në 2018 djali i Fatos Nanos u emërua drejtor i një agjensie të rendesishme! Dihet si dhe pse Edi Rama i ben të tilla emërime paçka se në parim kushdo ka të drejtë të bëje karriere e cila në këtë vend sot kalon vetëm nëpërmjet një njeriu që po si ofrove mbështetje s’te jep asgjë!

Nano i cili dikur pretendonte se nga pas i shkon historia tani ngjan ta ndjeke vetëm refreni i një kënge “për ca shetitje në makinë e humbë rininë”!

Shqipëria është vendi më interesant në botë, ajo të jep mundesinë të turperohesh sa herë të kesh qejf duke të dhënë vëmendje!