Basha mbledh këshilltarët bashkiakë të PD-së: Bashkitë janë kthyer në grupe të strukturuara kriminale

Lulzim Basha ka zhvilluar një takim me këshilltarët bashkiakë të Partisë Demokratike.

“Banka Botërore e ka konstatuar publikisht dështimin total të Reformës Territoriale. Jo thjesht agjendën politike të kthimit të territorit dhe të menaxhimit të territorit në një shtojcë të manipulimeve elektorale të zgjedhjeve të përgjithshme, por dështimin total me decentralizimin, i cili në vend që të çonte më shumë kompetenca dhe pushtet te bashkitë në funksion të qytetarëve, i ka bërë ato më jo transparente, më të bunkerizuara. Dhe siç e kemi parë në rastin e Bashkisë së Tiranës, dhe nuk është i vetmi rast, është më flagranti, i ka kthyer në grupe të strukturuara kriminale. Qytetarët e dinë dhe ne duhet ta themi me zë të lartë. Një grup i strukturuar si ai i bashkisë së Tiranës, rriti taksat dhe këto taksa i kanalizoi në xhepat e një grushti njerëzish që janë drejtorët e kryetarit të bashkisë. Me një filozofi të pastër vetëshërbimi. Taksat i marrim nga qytetarët dhe në vend që t’i kthejmë te qytetarët, i bëjmë pasuri tonat, i bëjnë hotele, i zhvasin dhe i depozitojnë në llogari bankare. Pra, një skemë e pastër mafioze”, tha Basha në fjalën e tij përpara këshilltarëve bashkiakë.