Basha: Rama ka futur vendin në krizë të thellë kushtetuese

Mbrojtja e mandatit të deputetes Olta Xhaçka nga socialistët në seancën e të enjtes, ka sjellë reagimin e Lulzim Bashës. Ai shprehet se Edi Rama e ka futur vendin në një krizë të thellë kushtetuese, për të mbrojtur korrupsionin e tij. “Edi Rama ka futur vendin në një krizë të thellë kushtetuese, për të mbrojtur korrupsionin e tij. Mbrojtja e mandatit të deputetes Xhaçka, duke i vendosur minat ligjit themeltar të shtetit, tregon edhe njëherë, se Rama nuk ka prioritet as Shqipërinë, as shqiptarët, por interesat e tij dhe ortakëve të tij strategjikë, me të cilët keqqeveris vendin”, shkruan Basha. Sipas tij Rama e ka kthyer kushtetutën në një letër higjienike dhe i bën thirrje SPAK-ut t’i shkojë deri në fund hetimit për statusin e investitorit strategjik.

Postimi i plotë

Edi Rama ka futur vendin në një krizë të thellë kushtetuese, për të mbrojtur korrupsionin e tij.

Mbrojtja e mandatit të deputetes Xhaçka, duke i vendosur minat ligjit themeltar të shtetit, tregon edhe njëherë, se Rama nuk ka prioritet as Shqipërinë, as shqiptarët, por interesat e tij dhe ortakëve të tij strategjikë, me të cilët keqqeveris vendin.

Përmes amnistimit të Xhaçkës, Rama kërkon amnistimin e tij. Por, kthimi i Kushtetutës, në një letër higjenike nga ana e kryeministrit më të korruptuar në Europë, nuk mund të amnistohet nga SPAK, i cili ka për detyrë t’i shkojë deri në fund hetimit të keqpërdorimit të statusit të investitorit strategjik.

Shqipëria meriton më shumë!