Berisha: Kam besim se SHBA do t’i ndihmojnë shqiptarët në betejën kundër narkoshtetit

Kryetari i Partisë Demokratike, Sali Berisha, nga New Jersey i bëri thirrje shqiptarëve në Shqipëri dhe diasporë që të bashkohen në betejën për çlirimin e Shqipërisë nga narkoshteti.

Berisha tha se vizita në SHBA nuk është vetëm për falënderime dhe festime, por edhe për të përcjellë një thirrje për shqiptarët në Kanada, Itali, Gjermani, Greqi, Spanjë dhe vende të tjera të Evropës e botës.

“Dita e sotme mund të jetë për ne një moment përmbushje dhe triumfi, por ne si shqiptarë kemi disa arsye shumë të forta që sot të mos jemi të përmbushur, të mos ndjehemi të përmbushur dhe triumfues. Jo dhe jo. Sepse Shqipëria, dheu ynë i dashur, po rrokulliset ndoshta më shumë se kurrë në ekzistencën e saj. Në Shqipëri ekstremi i majtë që ka lindur nga krimi, ka sunduar me krimin, është shartuar, është shartuar me kartelet e drogës të cilat presidenti i Shteteve të Bashkuara me shumë të drejtë po i krahason me organizatat terroriste”, tha ai.

“Ka zbrazur Shqipërinë me mbi 1 milion vetëm në zonën e Shengenit, sipas shifrave të Bashkimit Evropian. Ky narkoshtet antishqiptar është themeluar dhe drejtohet nga një individ i vetëm, që ka mbledhur të gjitha pushtetet në duart e tij, më shumë se diktatori i fundit, që sundon shqiptarët duke mos lejuar zgjedhje të lira, që ka shuar përfundimisht kufirin midis partisë dhe shtetit”, vijoi ai.

Kreu i PD-së kritikoi edhe qëndrimin e qeverisë shqiptare ndaj Kosovës, duke ngritur njëherësh edhe akuza për bashkëpunim me presidentin serb Aleksandar Vuçiç dhe duke e cilësuar atë si armik të interesit kombëtar dhe të Kosovës.

“Dua të përshëndes sot para jush dhe në emër tuaj, ish-udhëheqësit politikë të Kosovës që vuajnë vitet të tëra në burg nga projektet e këtij atdhe-shkatërruesi, dhe t’u uroj nga zemra të marrin pafajësinë dhe të kthehen të lirë në tokën e tyre”, tha Berisha.

Në fjalën e tij, kujtoi vizitën e tij në SHBA në vitin 1991, kur tha se kishte kërkuar mbështetje për përmbysjen e diktaturës komuniste, ndërsa shprehu besimin se SHBA do t’i ndihmojnë shqiptarët në përballjen me atë që ai e quan narkoshteti shqiptar.

“Nëse duam të ripërtërijmë Shqipërinë, kjo arrihet vetëm duke larguar nga pushteti Edi Ramën. Ndaj dhe unë sot kam një kërkesë për ju, këtë ditë kaq të veçantë, të na frymëzojë, ta përthithim si ditë të dinjitetit të një njeriu, si shembull për të çuar përpara betejën tonë, më të rëndësishme, shumë herë më të rëndësishme se sa këtë që festojmë sot. Betejën për dinjitetin e Shqipërisë, betejën për shpëtimin e Shqipërisë, në kushtet që është sot Shqipëria”, pohoi ai.

Berisha u ndal edhe te çështjet sociale dhe familjare, duke akuzuar qeverinë për politika që, sipas tij, cenojnë familjen shqiptare. Ai përmendi ligjin kundër diskriminimit, tekstet shkollore dhe çështje që lidhen me trajtimet hormonale te të miturit, duke e cilësuar familjen si një prej vlerave kryesore që duhet mbrojtur.

“Ju duhet ta dini se në Tiranë kanë filluar t’u japin hormonet, në kundërshtim me çdo ligj dhe parim, fëmijëve 13-vjeçarë. Në tekstet, prindërit emërtohen me numra. Me një ligj të quajtur anti-diskriminim de facto i jepet goditja më fatale familjes. Po. Një ligj që nuk e ka asnjë vend në botë, përveç Shqipërisë, kopshtit eksperimental të George Sorosit. Në rrezik të madh pra është familja shqiptare”, theksoi Berisha.

Berisha deklaroi se beteja e opozitës është një betejë për ekzistencën e familjes shqiptare dhe për të ardhmen e vendit.

Kreu i PD tha se, ky rikthim do të përdoret, për ndërtimin e një bashkëpunimi të shkëlqyer me Shtetet e Bashkuara të Amerikës

“Ky rikthim do të përdoret, për ndërtimin e një bashkëpunimi të shkëlqyer me Shtetet e Bashkuara të Amerikës, i një rëndësie jetike, për të ardhmen e vendit tonë. Kurrë shqiptarët nuk duhet të harrojnë se ky vend ka kontributin më të madh se çdo vend tjetër i planetit në lirinë e botës”, vijoi Berisha.

“Ky komb me qeveritë e tij, kanë kontributin më të madh dhe përcaktues në lirinë e kombit shqiptar nga vitet ’20 të shekullit të kaluar deri në vitet 2000 të këtij shekulli. Ndaj edhe ju siguroj, se këtë rikthim do ta përdor, do ta përdorim së bashku, për ndërtimin e marrëdhënieve, të partneritetit më të shkëlqyer në interesin më të mirë të dy vendeve dhe kombeve tona, me këtë vend dhe qeverinë e Shteteve të Bashkuara”, tha Berisha.

“Partia Demokratike ka një program, e cila nga themelimi i saj gjer sot, ka patur interesin e parë, interesin kombëtar, e cila vendos familjen në themel të shoqërisë, e cila në këtë situatë të krijuar dramatike, do bëjë gjithçka me ripopullimin e Shqipërisë, për ripopullimin e Shqipërisë”, tha Berisha.

Ai nga SHBA u bëri apel shqiptarëve në diasporë që të bashkohen me protestën që po zhvillohet në Tiranë.

Prej tre muajsh, rinia dhe qytetarët e Tiranës janë angazhuar në një protestë, më të madhen që nga vitet 90. Në këtë protestë, ata kërkojnë largimin e Edi Ramës. Kërkojnë veprimin, funksionimin e institucioneve. Kërkojnë mbrojtjen e pasurive publike, dhe ai sillet si një tiran i vërtetë ndaj tyre. Ndaj dhe unë ju bëj thirrje ju, i bëj thirrje diasporës shqiptare kudo në botë, të japë kontributin e saj në këtë protestë. Partia Demokratike e mbështet fuqishëm atë”, përfundoi kreu i PD.

/e.i/a.f/ ATSH