Berisha tha se kryeministri Rama e ka përjetuar protestën dhe zhvillimet përreth saj si “Vaterlonë politike”

Kryetari i Partisë Demokratike, Sali Berisha reagoi sot përmes një videomesazhi pas protestës së qytetarëve, rinisë dhe diasporës, duke iu përgjigjur mesazhit të kryeministrit Edi Rama.
Berisha tha se kryeministri Rama e ka përjetuar protestën dhe zhvillimet përreth saj si “Vaterlonë politike”, duke iu referuar në mënyrë figurative disfatës së Napoleonit në betejën e Vaterlosë.
Gjatë fjalës së tij, Berisha tha se protesta e gjysmë milioni shqiptarëve dhe rrethimi masiv i Kryeministrisë përbënin një moment historik, të cilin Rama e ka përjetuar si një disfatë të rëndë politike.
Sipas Berishës, kryeministri “kërcënoi protestuesit me masakra dhe me përgjakje, me histori vrasjesh e të tjerë”.
“Edi Rama duket se protestës së gjysmë milioni shqiptarëve dhe rrethimit të ngjeshur të mëngjesit, de facto rënien e Bastijës, e ka përjetuar si një fushëbetejë të mbushur me kufoma, kafka, gjymtyrë, plëndës e zorrë njerëzish dhe kuajsh, si Vaterlonë e tij”, tha Berisha.

Me këtë rast, sipas Berishës, “meqenëse ka përdorur një personazh të Stendalit për narrativën e tij, do t’i përgjigjem se për Vaterlonë ka me qindra personazhe nga rreshterë në feldmareshall romantik si Fabricio, por midis të gjithë atyre Edi Rama është si vëlla siamez vetëm me njërin prej tyre: me rreshterin Tenardie të Viktor Hygoit, i cili nuk luftonte, por vidhte të plagosurit dhe u shkulte dhëmbët e florinjtë”.
“Njëlloj si Tenardie, Edi Rama, vjedh dhe ka vjedhur këtë kohë popullin më të varfër. Ka vjedhur votën, vjedh fondet, vjedh kafshatën, vjedh librat e shkollës, vjedh ilaçet e të sëmurëve, vjedh pasuritë publike sikur të ishte një kolonizator, vjedh shpresën, rininë e shqiptarëve”, shkruan Berisha.
Berisha i bëri thirrje Kryeministrit të largohet nga detyra dhe të përballet me drejtësinë.
“Ndaj dhe thirrja ime: largohu sa më parë nga detyra dhe prit verdiktin e drejtësisë, e cila vonon, por nuk harron”, shkruan Berisha.