Blendi Gonxhja në Zyrihu për të prezantuar Shqipërinë si potencialin i jashtëzakonshëm, kulturor, turistik dhe ekonomik

Ministri i Turizmit, Kulturës dhe Sportit, Blendi Gonxhja, ka bërë të pranishme përmes një publikimi në mediat sociale vizitën e tij në Zvicër, ku ka zhvilluar një sërë takimesh dhe diskutimesh të fokusuara në potencialet e Shqipërisë në fushën e kulturës, turizmit, investimeve dhe zhvillimit të qëndrueshëm.

Vizita në Zyrih është konceptuar si një mundësi për të prezantuar Shqipërinë jo vetëm si një destinacion turistik me një potencial të jashtëzakonshëm, por edhe si një vend ku kultura, trashëgimia, identiteti europian dhe investimet mund të ndërthuren në projekte me vlerë afatgjatë.

Gonxhja bën me dije se vizita nisi me ftesën e Fondacionit Besa, në një mbrëmje kushtuar potencialit të Shqipërisë si destinacion kulturor dhe turistik. Në qendër të diskutimeve ishin investimet në projekte që ndërthurin trashëgiminë shpirtërore dhe kulturore me zhvillimin e turizmit, duke e vendosur identitetin shqiptar dhe vokacionin europian të vendit në një perspektivë të re zhvillimore.

Kjo qasje merr një rëndësi të veçantë në një kohë kur turizmi nuk shihet më thjesht si një sektor i ekonomisë së shërbimeve, por si një nga instrumentet përmes të cilëve një vend prezanton identitetin, historinë, kulturën dhe potencialin e tij përpara botës. Për Shqipërinë, pasuria e trashëgimisë kulturore dhe shpirtërore përbën një kapital që mund të shndërrohet në vlerë ekonomike, nëse ruhet, promovohet dhe integrohet në mënyrë të qëndrueshme në ofertën turistike.

Në ditën pasuese, ministri mori pjesë në Safe Heaven Forum, ku fokusi u zhvendos drejt zhvillimeve globale ekonomike, perspektivave të investimeve dhe mënyrave për përballimin e risqeve në një ekonomi gjithnjë e më të ndërlidhur dhe të dixhitalizuar.

Në diskutime u trajtuan tema që prekin drejtpërdrejt të ardhmen e ekonomisë globale: investimet, menaxhimi i riskut, portofolet, identiteti dixhital dhe transformimi i tregjeve. Në këtë panoramë, Shqipëria synon të pozicionohet si një treg me ambicie dhe avantazhe strategjike, duke ndërtuar një qasje më konkurruese për tërheqjen e kapitalit dhe talenteve.

Sipas Gonxhjes, këto zhvillime lidhen edhe me përpjekjen e Shqipërisë për të krijuar një imazh të ri në hapësirën europiane dhe ndërkombëtare: atë të një vendi të sigurt, të hapur ndaj investimeve dhe me potencial për zhvillim cilësor e të qëndrueshëm.

“Një diskutim me rëndësi për pozicionimin e Shqipërisë si një destinacion i sigurt, si një treg ambicioz për investime cilësore dhe zhvillim të qëndrueshëm”, shkruan ministri në përfundim të publikimit të tij.

Në thelb, vizita në Zyrih shkon përtej një axhende institucionale. Ajo është edhe një përpjekje për ta paraqitur Shqipërinë përmes një narrative të re, ku turizmi nuk ndahet nga kultura, investimi nuk ndahet nga identiteti dhe zhvillimi ekonomik nuk ndahet nga nevoja për qëndrueshmëri.

Shqipëria e sotme po kërkon të konkurrojë jo vetëm me bukurinë e natyrës, por edhe me historinë, trashëgiminë, pozicionin gjeografik, klimën e favorshme për investime dhe potencialin e saj njerëzor. Në këtë kuptim, prezantimi i vendit në forume ndërkombëtare merr vlerë pikërisht atëherë kur arrin të ndërtojë një urë mes asaj që Shqipëria është dhe asaj që synon të bëhet.

Nga Zyrihu, mes diskutimeve për kulturën, turizmin, kapitalin, teknologjinë dhe sigurinë e investimeve, mesazhi është i qartë: Shqipëria dëshiron të shihet jo vetëm si një vend për t’u vizituar, por edhe si një vend ku ia vlen të investosh, të krijosh, të zhvillosh ide dhe të ndërtosh të ardhmen.

Albert Vataj