Deputeti Roshi: Pa koalicione, Rama përjetëson pushtetin

Deputeti Artur Roshi, del kundër ndryshimeve të njëanshme kushtetuese. I ftuar në ”Ora News”, ai thotë se kryeministri Edi Rama po mundohet të bëjë ndryshime në kushtetutë për pushtetin dhe interesin e tij.

”Unë nuk mund të dal asaj që mendoj, dhe kundër asaj që shqiptarët presin. Nëpërmjet kësaj ndërhyrje që do të bëjë kryeministri në kushtetutë, është një ndërhyrje që bën në pushtetin e sovranit. Që të mbështetësh një ndryshim kushtetues por dhe të një ligji, duhet të gjesh një logjikë që të mbështetesh mbi të. Kush është logjika që kryeminstri kërkon të ndryshojë kushtetutën? Sipas meje, është një logjikë pragmatiste vetëm për personin e tij, për partinë e tij, ku fshihen interesat e tij personale. Ne nuk mund të futemi në kushtetutë për të përjetëuar pushtetin e një individi ose të një partie që përfaqëson gjysmën ose më pak se gjysmën e besimit politik të shqiptarëve. Rama nuk është në anën e duhur”.

Sipas tij, mungesa e koalicioneve parazgjedhore përjetëson pushtetin e kryeministrit Rama. ”Mungesa e koalicioneve parazgjedhore përjetëson pushtetin e Ramës deri sa t’i vijë rradha Zahos, po ta themi me humor. Rama duhet të gjejë fuqi brenda vetes, të sillet si lider, siç e ka thënë disa herë që nuk do të jetë i përjetshëm. Le ta tregojë që nuk do të jetë i përjetshëm. Me këtë që po bën, mundohet të ngrejë një tirani të butë të pushtetit të tij dhe të Partisë Socialiste”.