Nënkryetarja e LSI-së, Erisa Xhixho kërkoi dje reagim zyrtar nga ana e qeverisë lidhur me strategjinë e vaksinimit të popullsisë për koronavirusin. “Z.Kryeministër po ne ku jemi me rezervimin e dozave të vaksinës për qytetarët Shqiptar? Përhapja e pandemisë dhe rastet e shtuara të njerëzve të infektuar me Covid-19 kërkojnë sot angazhimin e qeverisë Shqiptare për të rezervuar dozat e vaksinës sapo ato të futen në prodhim siç po bëjnë progresivisht shumë shtete në botë e rajon, të cilat vlerësojnë situatën me përgjegjësi dhe shumë seriozitet. Ku jemi ne me përgatitjet masive për pajisjen me vaksina sa më parë!?”,- shkruan Xhixho në një postim në Facebook.
Xhixho shprehet se deri më sot nuk ka asnjë informacion zyrtar dhe asnjë përpjekje institucionale nga qeveria për masat që janë marrë në këtë drejtim. “Për momentin asnjë informacion nuk është përcjellë nga qeveria Shqiptare, e cila ka detyrimin të informojë publikun për masat e marra në këtë drejtim. Ne krizën e thellë të shëndetit publik që po jetojmë nevojitet trasparencë e plotë për menaxhimin e pandemisë e mbi të gjitha informacion i sakte se ku jemi në lidhje me këtë fazë tepër të rëndësishme të rezervimit të vaksinave. Qeveria duhet t’i japi garanci popullit Shqiptar që vendi jonë ka rezervuar dozat e nevojshme të vaksinës, që nuk do të ngelemi si bisht i kavallit. Në Shqipëri sipas OBSH për fazën e parë të vaksinimit do të duhen rreth 500 mijë doza (20% e popullsisë) kryesisht për grupet e rriskut dhe ekipin mjekësor”,- deklaron Erisa Xhixho.
Nënkryetarja e LSI-së sjellë në vëmendje përpjekjet që po bëjnë shtetet e tjera për vaksinën duke nisur nga vendet fqinj si Maqedonia e Veriut. “Ndërkohë që BE ka mbyllur marrëveshjen me AstraZeneca PLC për të blerë 400 milion doza vaksinë për Covid -19, pritet që doza e parë të jetë e vlefshme në muajin e ardhshëm. Greqia do të marrë vaksinën vetëm në fund të 2020. Maqedonia e Veriut po bën përpjekjet e saj për të siguruar vaksinën e COVID -19 nëpërmjet Polonisë pasi nuk është pjesë e BE. Mbretëria e Bashkuar ka rezervuar 100 milionë doza të vaksinës po ashtu tek firma farmaceutike AstraZeneca, kërkimet e të cilës bëhen në bashkëpunim me Universitetin e Oxfordit”,- deklaron Erisa Xhixho.
Xhixo shton se “SHBA ka rezervuar 100 milionë doza të vaksinës tek Moderna dhe ka investuar 955 milionë dollarë. Pritet që në tetor vaksina të jetë gati. Zvicra ka rezervuar 4.5 milionë doza vaksinë gjithashtu tek Moderna. Pyetja e thjeshtë që Qeveria Shqiptare duhet të japi përgjigje është: po ne ku jemi me rezervimin e dozave të vaksinës për qytetarët Shqiptar?”. Nënkryetarja e LSI-së shton se përgjegjësia për jetët e humbura si pasojë e neglizhencës me përballimin e pandemisë është e qeverisë “Rama. “Nga kjo epidemi fatkeqësisht janë humbur shume jetë njerëzish, asnjë jetë më shumë nuk duhet humbur nga vonesa për akses në vaksina të popullit shqiptar. Çdo jetë e humbur me tej, si pasojë e pengesave dhe vonesave për akses në vaksinë, mungesës së përgatitjes apo paaftesisë organizative do të jetë përgjegjësi direkte e qeverisë”,- deklaron Erisa Xhixho.