Gjekmarkaj: Basha duhet të flasë më shumë, e ka detyrim. Mbi të po derdhen shumë akuza

Deputeti i PD-së dhe kreu i Komisionit të Mediave në Kuvend, Agron Gjekmarkaj thotë se ka ardhur një pikë që Lulzim Basha duhet të flasë më shumë pas akuzave dhe ligjëratës së ish-kryeministrit Sali Berisha që ka sulmuar prej disa javësh.

“Ka një dialektikë të ngjarjeve në dinamikë në PD prej 5 javësh dhe ka një ligjërim të Sali Berishës që vjen kreshendo me akuza nga më të rëndat deri tek kodi moral, besëthyerja, besëprerja, pengmarrja dhe është ligjërimi asgjësues që jemi mësuar që përdor Berisha.

Për mua ka ardhur një pikë që Basha duhet të flasë më shumë, më me transparencë, më thellë sepse ka marrë një vendim në suazën e një konteksti gjeo-strategjik. Mbi të po derdhen shumë akuza, gjithë ata njerëz që besojnë tek Lulzim Basha sigurisht kanë nevojë të dëgjojnë diçka më tepër, diçka më shumë. Në këtë kontekst Basha e ka detyrim të flasë, të shpjegojë diçka më shumë se çka thënë në mënyrë alegorike.

Ende janë deklarata të kujdesshme. Nuk po e ftoj Lulzim Bashën të shkujdeset, por në pozitat e një njeriu që do të kuptojë dhe vetë më shumë, në pozitat e një qytetari do të dëgjojë më tepër nga Basha, jo ta ndërsejë ndaj Sali Berishës”,-tha në ”News 24”.